Karonavirus. Kasallanganlar: 720 117 Odam. O'zbekistonda: 145
O‘zbekistonda koronavirus infeksiyasi aniqlangan bemorlar soni 18 nafarga yetdi. Bu haqda Sog‘liqni saqlash vazirligi matbuot xizmati xabar bermoqda.
Ma’lum bo‘lishicha, 11-mart kuni Fransiyadan qaytgan, O‘zbekistondagi rasman birinchi koronavirus tashuvchisiga aylangan oliy toifali shifokor ayolning onasi, kelini va birga ishlaydigan hamkasbida ham koronavirus aniqlangan.
Vazirlikdan ma’lum qilishlaricha, har uch fuqaro ham shu vaqtgacha tibbiy nazoratda bo‘lgan. Avvalroq birinchi bemor ayolning o‘g‘li, qizi, turmush o‘rtog‘i, nevarasi, shuningdek, bir qarindoshida ham koronavirus aniqlangan edi.
“Infeksiya tarqalib ketishining oldini olish maqsadida olib borilayotgan epidemiologik surishtiruv ishlari davom ettirilmoqda”, — deyiladi Sog‘liqni saqlash vazirligi axborotida.
Bir kunda yettita yangi kasallanish holati
O‘zbekistonda koronavirusga chalinish bilan dastlabki holat 15-mart kuni soat 6:00 da qayd etilgan edi. Virus 11-mart kuni tongda Fransiyadan qaytgan oliy toifali shifokor ayolda aniqlangan. Keyinchalik uning o‘g‘li, qizi, turmush o‘rtog‘i, nevarasi, onasi, kelini, yana bir qarindoshi va bir hamkasbida ham virus aniqlandi.
15-mart oqshomida O‘zbekistonda koronavirusning yangi tashuvchisi qayd etildi — 15-mart kuni tongda Istanbul—Toshkent reysida qaytgan erkakda kasallik aniqlandi. Keyinchalik uning rafiqasi, shu reysda bo‘lgan yana bir fuqaro hamda boshqa bir er-xotin ham kasallangani ma’lum bo‘ldi.
14-mart kuni amalga oshirilgan London—Toshkent reysida kelgan O‘zbekiston fuqarosida 16-mart kuni koronavirus aniqlangani ma’lum qilindi. Keyinchalik uning ham rafiqasidan, shuningdek, shu reysda bo‘lgan yana bir yo‘lovchida ham koronavirus aniqlandi. 17-mart kuni rasmiylar Dubaydan kelgan yana bir fuqaroda infeksiya aniqladi.
Shunday qilib, O‘zbekistonda 15-mart kuni to‘rt kishida, 16-mart kuni to‘rt kishida, 17-mart kuni uch kishida, 18-mart kuni esa yetti kishida koronavirus aniqlandi.
