“Bunday paytda hazil ketmaydi”. Abdulla Aripov koronavirus bo‘yicha asossiz ma’lumot tarqatganlarga chora ko‘rilishi haqida

O‘zbekistonga kirib kelgan koronavirus infeksiyasi to‘g‘risida kuniga ikki yoki uch marta OAVga axborot yetkazish tizimi yo‘lga qo‘yiladi. Bu haqda 15-mart, yakshanba kuni, O‘zbekiston bosh vaziri Abdulla Aripov ishtirokida koronavirus tarqalishining oldini olish bo‘yicha ko‘rilayotgan choralarga bag‘ishlagan matbuot anjumanida ma’lum qilindi.

“Daryo” muxbirining xabar berishicha, bosh vazir OAV vakillarini koronavirus bilan bog‘liq turli asossiz, fuqarolarni vahimaga soluvchi ma’lumotlar tarqatmaslikka chaqirdi.

“Agar birortasi o‘zi bilganicha, noto‘g‘ri fikrlar aytib, aholini vahimaga soladigan axborot tarqatsa, jinoiy javobgarlikka tortiladi. Qonunchilikda ham bu borada jazo chorasi nazarda tutilgan moddalar bor. Bizni turli texnik choralarni ko‘rishga majbur qilmang. Kerak bo‘lsa, umuman efirga chiqmaydigan qilib qo‘yamiz. Internet tarmog‘idan ham o‘chirishimiz mumkin. Texnik vositalarimiz yetarli.

Boshqalarni qo‘rqitish va qo‘rquvga solish bilan har xil ma’lumotni tarqatmoqchi bo‘layotganlar ommaviy axborot vositasi qanday kuchga ega ekanligini yaxshi biladi. Shu bilan birga buni ishlatish, ya’ni axborot tarqatish juda og‘ir mas’uliyat. Buni qonunlarni yaxshi tushungan, rasmiy axborot va yolg‘on xabarlarning farqini yaxshi biluvchi, mas’uliyatni zimmasiga oladigan odam qilishi kerak. Bunday paytda hazil ketmaydi.

Kecha bittasi qaysidir mamlakatda koronavirusga qarshi mol peshobini ichishganini yozib, chiqaribdi. Bu nima degan gap? Shuni bizning Telegram kanali tarqatyapti. Mana shunday behayo, aqlsiz, befarosat narsalarni tarqatmoqchi bo‘lganlarga men yana qaytarib aytaman, kim nima desa, desin, ushbu yolg‘on xabarlarni tarqatib, aholida sarosima yuzaga keltirishga uringanlarga qat’iy chora ko‘ramiz”, — dedi Aripov.

Bosh vazir matbuot anjumani davomida karantin sharoitida narxlarni sun’iy oshirgan “savdogarlar”ga nisbatan jinoiy jazo tayinlanishini, avtomobillar narxi oshishiga qarshi namoyish o‘tkazish haqida xabar tarqatgan yigitga jazo chorasi ko‘rilganini ham aytib o‘tgan.

Shuningdek, tadbirda O‘zbekiston koronavirus sabab avia va avtoqatnovlarni to‘xtatishi, hukumatning barcha diniy tashkilotlarga diniy yig‘inlarni vaqtincha o‘tkazmaslik bo‘yicha tavsiya bilan chiqqani ma’lum qilingan.

Koronavirus sabab O‘zbekistonda Navro‘z sayillari bekor qilingan, barcha maktablar, bog‘chalar va OTMlar karantinga yopilishi haqida xabar berilgan.