Neftning asosiy eksportchilari bo‘lgan OPEK+ mamlakatlari o‘rtasida neft qazib olishni qisqartirish bo‘yicha yuzaga kelgan kelishmovchilik dunyoda neft narxining keskin pasayishiga olib keldi. Qozog‘iston mazkur holatning salbiy oqibatlariga qarshi kurashish uchun mamlakat bosh vaziri rahbarligida maxsus shtab tuzdi. Bu haqda “Inform Byuro” xabar berdi.
Qayd etilishicha, 9-mart, dushanba kuni, Brent markali neftning jahon bozorlaridagi narxi bir barrel uchun 31-33 dollarni tashkil etmoqda.
Ma’lum qilinishicha, mazkur sharoitlarda Qozog‘iston hukumati va Milliy banki uchun makroiqtisodiy barqarorlikni va soliq-budjet siyosatining samaradorligini ta’minlash, inflyatsion jarayonlarni boshqarish va mamlakatda ijtimoiy barqarorlikni saqlash davlat siyosatining ustuvor yo‘nalishlari bo‘lib qoladi.
Ta’kidlanishicha, tashqi bozorlarda yuzaga kelayotgan vaziyat va uning Qozog‘iston iqtisodiyotiga ta’siri doimiy ravishda monitoring qilinmoqda.
Eslatib o‘tamiz, OPEK+ mamlakatlari neft qazib olishni qisqartirish yuzasidan bir qarorga kela olmagani haqida tarqalgan xabarlardan keyin neft narxi dastlab 4 dollarga pasaygan edi. 9-mart kungi ochiq savdolarda Brent markasidagi neft narxi birdaniga 20 foizga pasayib, 38 dollarni tashkil etdi. Rossiyada esa dollar va yevro keskin qimmatlashdi. Goldman Sachs neft narxi bir barrel uchun 20 dollarga tushib ketishi mumkinligini ma’lum qildi. Kun davomida neft narxining pasayishi tezlashib, Brent markasidagi neftning narxi avvalgi minimumidan o‘tib, bir barreli uchun 31,38 dollargacha tushib ketdi. Saudi Aramco neft kompaniyasi aksiyalari 10 foizga pasaydi.
Izoh (0)