Нефтнинг асосий экспортчилари бўлган ОПЕК+ мамлакатлари ўртасида нефть қазиб олишни қисқартириш бўйича юзага келган келишмовчилик дунёда нефть нархининг кескин пасайишига олиб келди. Қозоғистон мазкур ҳолатнинг салбий оқибатларига қарши курашиш учун мамлакат бош вазири раҳбарлигида махсус штаб тузди. Бу ҳақда «Inform Бюро» хабар берди.
Қайд этилишича, 9 март, душанба куни, Brent маркали нефтнинг жаҳон бозорларидаги нархи бир баррель учун 31-33 долларни ташкил этмоқда.
Маълум қилинишича, мазкур шароитларда Қозоғистон ҳукумати ва Миллий банки учун макроиқтисодий барқарорликни ва солиқ-бюджет сиёсатининг самарадорлигини таъминлаш, инфляцион жараёнларни бошқариш ва мамлакатда ижтимоий барқарорликни сақлаш давлат сиёсатининг устувор йўналишлари бўлиб қолади.
Таъкидланишича, ташқи бозорларда юзага келаётган вазият ва унинг Қозоғистон иқтисодиётига таъсири доимий равишда мониторинг қилинмоқда.
Эслатиб ўтамиз, ОПЕК+ мамлакатлари нефть қазиб олишни қисқартириш юзасидан бир қарорга кела олмагани ҳақида тарқалган хабарлардан кейин нефть нархи дастлаб 4 долларга пасайган эди. 9 март кунги очиқ савдоларда Brent маркасидаги нефть нархи бирданига 20 фоизга пасайиб, 38 долларни ташкил этди. Россияда эса доллар ва евро кескин қимматлашди. Goldman Sachs нефть нархи бир баррель учун 20 долларга тушиб кетиши мумкинлигини маълум қилди. Кун давомида нефть нархининг пасайиши тезлашиб, Brent маркасидаги нефтнинг нархи аввалги минимумидан ўтиб, бир баррели учун 31,38 долларгача тушиб кетди. Saudi Aramco нефть компанияси акциялари 10 фоизга пасайди.
Изоҳ (0)