Markaziy harbiy okrug jangovar tayyorgarlik boshqarmasi tomonidan O‘zbekiston armiyasidagi eng katta va zamonaviy ko‘rinishga ega bo‘lgan dala o‘quv maydonlari reytingi tuzildi. Bu haqda harbiy jurnalist Kapitan G‘ayrat Madrahimov ma’lum qildi.
Unga ko‘ra, hududi va zamon talablariga mosligi, aviatsiya hamda artilleriya qurollaridan o‘t ochish imkoniyatidan kelib chiqib, Markaziy harbiy okrug tasarrufidagi “Kattaqo‘rg‘on” poligoni birinchilikda e’tirof etiladi.
Keyingi o‘rinda Jizzax viloyatidagi “Forish” tog‘ poligoni turadi. Bu yerda o‘tgan yilning o‘zida AQSh, Fransiya, Buyuk Britaniya, Hindiston, Rossiya, Turkiya, Pokiston hamda Xitoy qurolli kuchlari vakillari bilan 16 marta harbiy hamkorlik doirasida taktik va maxsus mashg‘ulotlar, treninglar o‘tkazildi. Shuningdek, 2019-yilda ilk bor O‘zbekiston mezbonlik qilgan “Armiya—2019” xalqaro armiya o‘yinlari bo‘lib o‘tdi.
3-o‘rinda Janubi-g‘arbiy maxsus harbiy okrugiga qarashli “Buxoro” umumqo‘shin dala o‘quv maydoni turadi. Ushbu poligon kuchishlatar bo‘linmalar bilan hamkorlikda o‘quv mashqlar o‘tkazilishi uchun juda qulay hisoblanadi. Bu yerda har yili an’anaviy tarzda mutaxassisliklar bo‘yicha musobaqalar tashkil etiladi. Shimoli-g‘arbiy harbiy okrugining yagona “Nukus” poligoni 4-o‘rinni egalladi.
Reytingda 5-o‘rindan Sharqiy harbiy orkugdagi “Sho‘rsuv” va “G‘urumsaroy” dala o‘quv maydoni joy oldi. Ular qulay joylashuvi hamda parashyutdan sakrash mashqlarining ko‘p o‘tkazilishi bilan ajralib turadi. “G‘urumsaroy” poligonida 2019-yilda dunyo standartlariga to‘la javob beradigan 20,7 milliard so‘mlik qurilish ishlari amalga oshirildi. Qashqadaryo viloyatida joylashgan “Muborak” va “Nuriston” dala o‘quv maydonlari 6 va 7-o‘rinlarni band etdi. “Termiz” poligoni esa 8-o‘ringa munosib deb topildi.
Toshkent harbiy okrugidagi “Chirchiq” poligoni harbiy paradlar o‘tkazilishi bilan alohida ajralib turadi. Shu bilan birga, mazkur poligon 3 ta oliy harbiy bilim yurti kursantlari, Mudofaa vazirligi markaziy apparati, Chirchiq garnizoni harbiy xizmatchilari hamda kuch tuzilmalarning bo‘linmalarini harbiy amaliy tayyorgarlik bilan shug‘ullanishi uchun xizmat qilmoqda.
Qurolli Kuchlar bo‘yicha eng ixcham hamda harbiy amaliy mashg‘ulotlar olib borishda o‘quv joylarining keng qamrovligi jihatidan Samarqand garnizonidagi “Sazagan” poligoni ushbu reyting o‘ntaligidan joy oladi. Mazkur dala o‘quv maydonining rasman ochilish marosimi 2020-yilning 14-mart kuniga rejalashtirilgan.
Izoh (0)