Марказий ҳарбий округ жанговар тайёргарлик бошқармаси томонидан Ўзбекистон армиясидаги энг катта ва замонавий кўринишга эга бўлган дала ўқув майдонлари рейтинги тузилди. Бу ҳақда ҳарбий журналист Капитан Ғайрат Мадраҳимов маълум қилди.
Унга кўра, ҳудуди ва замон талабларига мослиги, авиация ҳамда артиллерия қуролларидан ўт очиш имкониятидан келиб чиқиб, Марказий ҳарбий округ тасарруфидаги «Каттақўрғон» полигони биринчиликда эътироф этилади.
Кейинги ўринда Жиззах вилоятидаги «Фориш» тоғ полигони туради. Бу ерда ўтган йилнинг ўзида АҚШ, Франция, Буюк Британия, Ҳиндистон, Россия, Туркия, Покистон ҳамда Хитой қуролли кучлари вакиллари билан 16 марта ҳарбий ҳамкорлик доирасида тактик ва махсус машғулотлар, тренинглар ўтказилди. Шунингдек, 2019 йилда илк бор Ўзбекистон мезбонлик қилган «Армия—2019» халқаро армия ўйинлари бўлиб ўтди.
3-ўринда Жануби-ғарбий махсус ҳарбий округига қарашли «Бухоро» умумқўшин дала ўқув майдони туради. Ушбу полигон кучишлатар бўлинмалар билан ҳамкорликда ўқув машқлар ўтказилиши учун жуда қулай ҳисобланади. Бу ерда ҳар йили анъанавий тарзда мутахассисликлар бўйича мусобақалар ташкил этилади. Шимоли-ғарбий ҳарбий округининг ягона «Нукус» полигони 4-ўринни эгаллади.
Рейтингда 5-ўриндан Шарқий ҳарбий оркугдаги «Шўрсув» ва «Ғурумсарой» дала ўқув майдони жой олди. Улар қулай жойлашуви ҳамда парашютдан сакраш машқларининг кўп ўтказилиши билан ажралиб туради. «Ғурумсарой» полигонида 2019 йилда дунё стандартларига тўла жавоб берадиган 20,7 миллиард сўмлик қурилиш ишлари амалга оширилди. Қашқадарё вилоятида жойлашган «Муборак» ва «Нуристон» дала ўқув майдонлари 6 ва 7-ўринларни банд этди. «Термиз» полигони эса 8-ўринга муносиб деб топилди.
Тошкент ҳарбий округидаги «Чирчиқ» полигони ҳарбий парадлар ўтказилиши билан алоҳида ажралиб туради. Шу билан бирга, мазкур полигон 3 та олий ҳарбий билим юрти курсантлари, Мудофаа вазирлиги марказий аппарати, Чирчиқ гарнизони ҳарбий хизматчилари ҳамда куч тузилмаларнинг бўлинмаларини ҳарбий амалий тайёргарлик билан шуғулланиши учун хизмат қилмоқда.
Қуролли Кучлар бўйича энг ихчам ҳамда ҳарбий амалий машғулотлар олиб боришда ўқув жойларининг кенг қамровлиги жиҳатидан Самарқанд гарнизонидаги «Сазаган» полигони ушбу рейтинг ўнталигидан жой олади. Мазкур дала ўқув майдонининг расман очилиш маросими 2020 йилнинг 14 март кунига режалаштирилган.
Изоҳ (0)