Xitoyning 2019-nCoV koronavirusi bilan eng kam bolalar va o‘smirlar kasallanmoqda. Bu haqda xorijiy mamlakatlar va Rossiya olimlarining tadqiqotlari natijasiga asoslanib, “RBK” xabar berdi.
Xitoyning kasalliklar profilaktikasi va nazorati bo‘yicha markazi ma’lumotlariga ko‘ra, kasallanganlarning bor-yo‘g‘i 2 foizini bolalar va o‘smirlar (19 yoshgacha) tashkil etadi.
Rossiyalik ekspertlarning fikricha, bolalar boshqa kasalliklarni yuqtirish bo‘yicha xavf zonasida tursa-da, ularning koronavirusni yuqtirish ehtimoli kam.
O‘smirlar ham o‘z immun tizimi xususiyatlari tufayli kasallikka kam chalinadi. Koronavirusni yuqtirishga eng ko‘p 60 yoshdan oshgan insonlar moyil. Ularda boshqa kasalliklarni yuqtirish xavfi ham yuqori.
Nijegorod davlat universiteti biologiya va biomeditsina instituti direktori Mariya Vedunovaning aytishicha, inson immuniteti yosh o‘tgan sayin kuchsizlanadi. Keksa odamlarda surunkali kasalliklarning mavjudligi esa virusli infeksiyalar fonida asoratlarning rivojlanishiga olib keladi.
So‘nggi ma’lumotlarga ko‘ra, butun dunyo bo‘ylab koronavirusni yuqtirib olganlar soni 90 370 kishiga yetgan. Kasallikka chalinganlar soni bo‘yicha Xitoydan keyingi o‘rinlarda Janubiy Koreya (4335), Italiya (2036) va Eron (1501) ketmoqda. Jahon sog‘liqni saqlash tashkilotining ma’lum qilishicha, dunyoning 64 davlatida koronavirus aniqlangan.
Izoh (0)