Хитойнинг 2019-nCoV коронавируси билан энг кам болалар ва ўсмирлар касалланмоқда. Бу ҳақда хорижий мамлакатлар ва Россия олимларининг тадқиқотлари натижасига асосланиб, «РБК» хабар берди.
Хитойнинг касалликлар профилактикаси ва назорати бўйича маркази маълумотларига кўра, касалланганларнинг бор-йўғи 2 фоизини болалар ва ўсмирлар (19 ёшгача) ташкил этади.
Россиялик экспертларнинг фикрича, болалар бошқа касалликларни юқтириш бўйича хавф зонасида турса-да, уларнинг коронавирусни юқтириш эҳтимоли кам.
Ўсмирлар ҳам ўз иммун тизими хусусиятлари туфайли касалликка кам чалинади. Коронавирусни юқтиришга энг кўп 60 ёшдан ошган инсонлар мойил. Уларда бошқа касалликларни юқтириш хавфи ҳам юқори.
Нижегород давлат университети биология ва биомедицина институти директори Мария Ведунованинг айтишича, инсон иммунитети ёш ўтган сайин кучсизланади. Кекса одамларда сурункали касалликларнинг мавжудлиги эса вирусли инфекциялар фонида асоратларнинг ривожланишига олиб келади.
Сўнгги маълумотларга кўра, бутун дунё бўйлаб коронавирусни юқтириб олганлар сони 90 370 кишига етган. Касалликка чалинганлар сони бўйича Хитойдан кейинги ўринларда Жанубий Корея (4335), Италия (2036) ва Эрон (1501) кетмоқда. Жаҳон соғлиқни сақлаш ташкилотининг маълум қилишича, дунёнинг 64 давлатида коронавирус аниқланган.
Изоҳ (0)