Ўзбекистон коронавирус инфекцияси тарқалиши муносабати билан Хитойдан келиши мумкин бўлган минглаб сайёҳлардан айрилгани ҳақида аввал хабар берилган эди. Хитойнинг бир неча шаҳарлари билан мунтазам рейсларнинг тўхтатилиши Ўзбекистон туризм соҳасига таъсир кўрсатган ягона салбий омил сифатида кўрсатилган эди.
2019 йилда Ўзбекистонга 61,9 минг нафар хитойлик сайёҳ келган, 2020 йилда уларнинг сони 98 минг нафаргача кўпайиши кутилаётган эди. «Эпидемия сабабли хитойлик туристлар сони камайиши табиий», — деди Туризмни ривожлантириш давлат қўмитаси департамент бошлиғи Шуҳрат Исақулов.
Хитойлик сайёҳларнинг келмаслиги ортидан пайдо бўлиши мумкин бўлган зарарлар ўрнини Туризмни ривожлантириш давлат қўмитаси қўшни мамлакатлар билан алоқани мустаҳкамлаш ҳисобига тўлдирмоқчи. Хусусан, Россия, Қозоғистон, Туркманистон ва Тожикистондан сайёҳлик оқими ўсиши кутилмоқда.
Қўмита кўзда тутилган режаларни амалга ошириш учун 2020 йилнинг апрель—май ойларида қўшни мамлакатларда маҳаллий туризм соҳаси вакиллари иштирокида бир қатор тадбирлар ўтказади. Бундан ташқари, Туризмни ривожлантириш давлат қўмитаси Ўзбекистонни коронавирусдан холи мамлакат сифатида тарғиб қилмоқчи.
«Ўтган йили Хитойга 36 миллион сайёҳ ташриф буюрган эди. Уқув билан маркетинг сиёсати олиб борилса, ушбу оқимни мамлакатимизга йўналтиришимиз мумкин, биз буни бирорта ҳам коронавирус ҳолати аниқланмаган мамлакат сифатида амалга оширишимиз мумкин», — дея қайд этди Шуҳрат Исақулов.
Қўмита вакилларининг сўзларига кўра, турфирмалар Хитой, Жанубий Корея ёки Японияга сафарларнинг бекор қилиниши муносабати билан сайёҳларнинг Ўзбекистонга қизиқиш билдираётгани ҳақида хабар беришни бошлаган.
Изоҳ (0)