Ispaniyaning Tenerife orolidagi H10 Costa Adeje Palace mehmonxonasida karantin e’lon qilindi. Bunga mehmonxonada bir haftadan buyon yashayotgan italiyalik fuqaroda 24-fevral, dushanba kuni, kechqurun koronavirus aniqlangani sabab bo‘ldi.
Reuters agentligining yozishicha, 25-fevral, seshanba kuni, tongda mehmonxona ma’muriyati dam oluvchilarning eshigi ostida otel karantinga olingani haqidagi yozuvni qoldirgan.
Mehmonlar 14 kun davomida izolyatsiyada bo‘ladi. Mehmonxona saytida otel 15-martgacha yopilganligi to‘g‘risida xabar e’lon qilingan. Ma’muriyat xona bron qilganlarga Tenerifedagi boshqa mehmonxonalardan joy topib berishga va’da qilgan.
Koronavirus xotini bilan mehmonxonada dam olayotgan italiyalik erkakda aniqlangan. Bir kundan so‘ng uning xotini va ular bilan birga sayohat qilayotgan yana ikki kishi koronavirus bilan kasallangani ma’lum bo‘ldi.
H10 Costa Adeje Palace’da hozirda 700 dan ortiq turist yashamoqda. Otelga kirish, turistlarga esa binoni tark etish taqiqlab qo‘yildi.
Mehmonxonaga dushanba kuni kelgan va koronavirus bilan kasallangan italiyaliklar bilan aloqada bo‘lmagan 100 ga yaqin kishiga otelni tark etishga ruxsat berilishi aytildi.
Izoh (0)