Испаниянинг Тенерифе оролидаги H10 Costa Adeje Palace меҳмонхонасида карантин эълон қилинди. Бунга меҳмонхонада бир ҳафтадан буён яшаётган италиялик фуқарода 24 февраль, душанба куни, кечқурун коронавирус аниқлангани сабаб бўлди.
Reuters агентлигининг ёзишича, 25 февраль, сешанба куни, тонгда меҳмонхона маъмурияти дам олувчиларнинг эшиги остида отел карантинга олингани ҳақидаги ёзувни қолдирган.
Меҳмонлар 14 кун давомида изоляцияда бўлади. Меҳмонхона сайтида отел 15 мартгача ёпилганлиги тўғрисида хабар эълон қилинган. Маъмурият хона брон қилганларга Тенерифедаги бошқа меҳмонхоналардан жой топиб беришга ваъда қилган.
Коронавирус хотини билан меҳмонхонада дам олаётган италиялик эркакда аниқланган. Бир кундан сўнг унинг хотини ва улар билан бирга саёҳат қилаётган яна икки киши коронавирус билан касаллангани маълум бўлди.
H10 Costa Adeje Palace’да ҳозирда 700 дан ортиқ турист яшамоқда. Отелга кириш, туристларга эса бинони тарк этиш тақиқлаб қўйилди.
Меҳмонхонага душанба куни келган ва коронавирус билан касалланган италияликлар билан алоқада бўлмаган 100 га яқин кишига отелни тарк этишга рухсат берилиши айтилди.
Изоҳ (0)