Turkiya hukumati Dajla daryosi bo‘yida joylashgan 12 ming aholi istiqomat qiladigan Hasankayf shahrini suvga g‘arq qiladi — bu yerda yangi gidroelektr stansiya (GES) qurilishi yakuniga yetmoqda. Shahar bilan birga arxeologik yodgorlik, yaqin atrofdagi qishloq va boshqa aholi manzilgohlari ham suv ostida qoladi, deya xabar bermoqda “Gazeta.uz”.
“Ilisu” to‘g‘oni deyarli qurib bitkazib bo‘lingan. Suv ombori 20 foizga to‘ldirilgan, Janubi-Sharqiy Onado‘lini rivojlantirish bo‘yicha hukumatning keng miqyosli loyihasi doirasida bunyod etilgan GES 2020-yil mart oyida ishga tushadi. Reja bo‘yicha, u mamlakatdagi jami elektr energiyasining 4 foizini ishlab chiqaradi.
Daryoning qarama-qarshi sohilida 760 ta namunaviy uy, masjid, maktab, savdo markazi va muzey allaqachon qurib, bitkazib bo‘lingan. Mahalliy aholining aksariyati — bu joylarda asosan kurdlar yashaydi — o‘z uylarini tark etib bo‘lgan. Biroq ayrim fuqarolar ko‘chiriladiganlar ro‘yxatiga kirmagan va endi ular qayerda yashashini bilmayapti.
Turkiya va Iroqning o‘nlab jamoat tashkilotlari ushbu GESning qurilishiga qarshi chiqmoqda. Faollar va ekologlarning norozilik namoyishlari sabab yevropalik investorlar ushbu loyihada qatnashishdan bosh tortgan.
Ayni vaqtda Inson huquqlari bo‘yicha Yevropa sudi Hasankayfni saqlab qolish bo‘yicha murojaatnomani rad etdi. Strasburgdagi sudyalar Hasankayfni madaniy meros obyekti sifatida ma’muriy qarorlardan asrab qolish uchun yetarlicha asoslar topa olmagan.
Ekspertlarning fikricha, to‘g‘on 4000 ta g‘ordan iborat yerosti shahriga, shuningdek, mintaqa ekotizimiga tuzatib bo‘lmas zarar yetkazadi. Har yili yuz minglab sayyohlar Hasankayfdagi arxeologik yodgorliklarni tomosha qilish uchun kelardi. Hukumat mavjud tarixiy merosdan faqat sakkizta obyektni ko‘chirib o‘tkazishga qaror qilgan.
Izoh (0)