Zelenskiy Ukrainada Xitoydan qaytgan fuqarolar avtobusining toshbo‘ron qilinishini Yevropa o‘rta asrlar tarixiga xos holat deb baholadi

Ukraina prezidenti Vladimir Zelenskiy Xitoyning Uxan shahridan qaytgan mamlakat fuqarolarining hammasiga sog‘-salomatlik tiladi va ularning yaqin orada oila a’zolari bag‘riga eson-omon qaytishiga umid qilishini ta’kidladi. Shuningdek, ularni vatandoshdek qarshi olmagan ukrainaliklarning tajovuzkor harakatini keskin qoraladi. Bu haqda “RBK” xabar berdi.

“Biz doimiy ravishda Ukraina — Yevropa davlati ekanini aytamiz, biroq ayrim holatlarda o‘rta asrlar davridagi Yevropa mamlakatiga o‘xshab qolamiz. Afsus. Keling yaxshisi, hammamiz ham odam ekanimizni unutmaylik, bunday harakatlar haqida haqoratli so‘zlar aytmaganim ma’qul”, — degan Zelenskiy Facebook’dagi sahifasida.

https://www.facebook.com/president.gov.ua/videos/130075121673340/

20-fevral, payshanba kuni, Xitoydan evakuatsiya qilingan Ukraina fuqarolari Poltava viloyatining Noviye Sanjari qishlog‘idagi karantin tibbiyot markaziga olib borilgan. Ular kirib kelayotgan vaqtda qishloq aholisi yo‘llarni to‘sib, karantin hududiga kelayotganlarni kiritmaslikka uringan, oqibatda olomon va huquqni muhofaza qiluvchi organlar xodimlari o‘rtasida to‘qnashuv sodir bo‘lgan. Zelenskiy shu kunning o‘zida odamlarni xotirjam bo‘lish va ukrain millatining yomon fe’l-atvorini dunyoga “ko‘z-ko‘z” qilmaslikka chaqirgandi.

“Biz kulfatda qolgan har bir ukrainalikni qutqarish, evakuatsiya qilish yoki almashtirish uchun u qayerda bo‘lishidan qat’i nazar kurashamiz. Ukraina o‘z fuqarolarini xafa qildirib qo‘ymaydi. Davlat siyosati shunaqa bo‘lishini kafolatlayman. Biroq bunda jamiyatning ham davlat siyosati va harakatlariga to‘g‘ri reaksiya bildirishi tarafdoriman”, — deya gapirgan Zelenskiy Facebook’dagi videoda.

Ammo norozilik bildirayotganlar ushbu gaplardan keyin ham tarqalmadi, balki o‘z vatandoshlari o‘tirgan avtobuslarni toshbo‘ron qildi. O‘ndan ortiq politsiyachi olomon bilan to‘qnashuvlar vaqtida jarohat oldi va yaralandi, norozilik namoyishining 24 nafar ishtirokchisi qamoqqa olingan.

Ukraina sog‘liqni saqlash vaziri Zoryana Skaletskaya karantinga olib ketilayotgan fuqarolar oldiga borishi va u yerda to‘polon ko‘targan xalqni tinchlantirishga urinishini ta’kidlagan.