Зеленский Украинада Хитойдан қайтган фуқаролар автобусининг тошбўрон қилинишини Европа ўрта асрлар тарихига хос ҳолат деб баҳолади

Украина президенти Владимир Зеленский Хитойнинг Ухань шаҳридан қайтган мамлакат фуқароларининг ҳаммасига соғ-саломатлик тилади ва уларнинг яқин орада оила аъзолари бағрига эсон-омон қайтишига умид қилишини таъкидлади. Шунингдек, уларни ватандошдек қарши олмаган украиналикларнинг тажовузкор ҳаракатини кескин қоралади. Бу ҳақда «РБК» хабар берди.

«Биз доимий равишда Украина — Европа давлати эканини айтамиз, бироқ айрим ҳолатларда ўрта асрлар давридаги Европа мамлакатига ўхшаб қоламиз. Афсус. Келинг яхшиси, ҳаммамиз ҳам одам эканимизни унутмайлик, бундай ҳаракатлар ҳақида ҳақоратли сўзлар айтмаганим маъқул», — деган Зеленский Facebook’даги саҳифасида.

https://www.facebook.com/president.gov.ua/videos/130075121673340/

20 февраль, пайшанба куни, Хитойдан эвакуация қилинган Украина фуқаролари Полтава вилоятининг Новие Санжари қишлоғидаги карантин тиббиёт марказига олиб борилган. Улар кириб келаётган вақтда қишлоқ аҳолиси йўлларни тўсиб, карантин ҳудудига келаётганларни киритмасликка уринган, оқибатда оломон ва ҳуқуқни муҳофаза қилувчи органлар ходимлари ўртасида тўқнашув содир бўлган. Зеленский шу куннинг ўзида одамларни хотиржам бўлиш ва украин миллатининг ёмон феъл-атворини дунёга «кўз-кўз» қилмасликка чақирганди.

«Биз кулфатда қолган ҳар бир украиналикни қутқариш, эвакуация қилиш ёки алмаштириш учун у қаерда бўлишидан қатъи назар курашамиз. Украина ўз фуқароларини хафа қилдириб қўймайди. Давлат сиёсати шунақа бўлишини кафолатлайман. Бироқ бунда жамиятнинг ҳам давлат сиёсати ва ҳаракатларига тўғри реакция билдириши тарафдориман», — дея гапирган Зеленский Facebook’даги видеода.

Аммо норозилик билдираётганлар ушбу гаплардан кейин ҳам тарқалмади, балки ўз ватандошлари ўтирган автобусларни тошбўрон қилди. Ўндан ортиқ полициячи оломон билан тўқнашувлар вақтида жароҳат олди ва яраланди, норозилик намойишининг 24 нафар иштирокчиси қамоққа олинган.

Украина соғлиқни сақлаш вазири Зоряна Скалецкая карантинга олиб кетилаётган фуқаролар олдига бориши ва у ерда тўполон кўтарган халқни тинчлантиришга уринишини таъкидлаган.