Асака туманлараро иқтисодий суди судьяси С.Ҳусановнинг «Марҳаматтекстиль» компаниясига нисбатан даъво қўзғаган бир гуруҳ фермерларнинг ишини сайёр суд мажлисида кўриб чиқиш жараёнидаги хатти-ҳаракатлари ҳақида «Xabar.uz» нашрида «Сайёр судда судья ва ҳокимлик вакили ‘калла уриштирди’!» сарлавҳали мақола эълон қилинган эди. Мақолага Ўзбекистон Олий суди муносабат билдирди.
Мақолада судьянинг ҳокимлик вакили билан «калла уриштириши» ҳақида шундай дейилган эди:
«... Орадан чамаси 10 дақиқалар вақт ўтгач, тағин эшик очилиб, энди остонада Марҳамат тумани ҳокимлигининг бўлим бошлиқларидан бири кўринди. У иштирокчиларга қарата ‘Ҳорманглар!’ деди-да, тўппа-тўғри судьянинг қаршисига келди (худдики суд мажлисига эмас, чойхонадаги ошхўрликка келган одамдек!). Икки қўллаб кўришди. Хўшлашиш жараёнида томонлар енгилгина бош уриштириб ҳам олишди (ана манзара-ю мана манзара)!..».Олий суд матбуот хизмати раҳбари Азиз Обидовнинг маълум қилишича, мақолада қаламга олинган ҳолатлар тегишли тартибда ўрганиб чиқилган. Натижада Олий суд томонидан Андижон вилояти Асака туманлараро иқтисодий судининг раиси С.Ҳусановни интизомий жавобгарликка тортиш ҳақида тўпланган ҳужжатлар тегишли қарор қабул қилиш учун Судьялар олий кенгашига юборилган.
Изоҳ (0)