Yoshlar press-klubining navbatdagi sessiyasi 20-fevral, payshanba kuni, O‘zbekiston Yoshlar ittifoqi hamda Ichki ishlar vazirligi Jazoni ijro etish bosh boshqarmasi bilan hamkorlikda tashkil etildi.
Yoshlar media markazi matbuot xizmatining “Daryo”ga ma’lum qilishicha, ochiq muloqotda IIV rasmiysi O‘zbekiston qamoqxonalaridagi talabalar uchun qator vazirliklar birgalikda yana bir imkoniyat yaratish borasida sa’y-harakatlar olib borayotganini ta’kidladi.
“Hozirda 500 nafardan ziyod talaba jazoni ijro etish muassasalarida qilmishiga yarasha qonunda belgilangan jazosini o‘tamoqda. Ayni paytda ularni masofadan turib o‘qitish tizimini yo‘lga qo‘yish maqsadida Ichki ishlar, Adliya, Oliy va o‘rta maxsus ta’lim, Axborot texnologiyalari va kommunikatsiyalarini rivojlantirish vazirliklari hamkorligida Vazirlar Mahkamasi qarori loyihasi tayyorlanyapti.
Agar ushbu yangi tartib amalga oshsa, jazoni ijro etishga qadar talaba bo‘lgan shaxslar onlayn tarzda ta’lim olishadi. Ular bitiruv imtihonlarini jazo muddatini o‘tab bo‘lgach, ta’lim olgan OTMga borib topshiradi va shu tariqa diplomini qo‘lga kiritishi mumkin. Mahkumlar onlayn o‘qitish davrida zarur adabiyotlar bilan ta’minlanadi”, — dedi IIV Jazoni ijro etish bosh boshqarmasi podpolkovnigi Jamshid Sultonov.
Izoh (0)