O‘zbekiston Markaziy banki “Anor” tezkor to‘lovlar tizimini ishlab chiqdi. Ushbu yangi tizim yuridik shaxslar va yakka tartibdagi tadbirkorlar o‘rtasida real vaqt rejimida banklararo pul o‘tkazmalarini amalga oshirish imkonini beradi va uzluksiz ishlaydi. Bu haqda Markaziy bank xabar berdi.
Ma’lum qilinishicha, “Anor” tizimi veb-servislar texnologiyasi asosiga qurilgan va elektron raqamli imzo orqali foydalaniladi. Bu tizim to‘lovchilarga masofadan turib banklararo to‘lovlarni amalga oshirishga sharoit yaratadi. Bundan tashqari, bankka tashrif buyurishga ehtiyoj qolmaydi va hisobvaraqqa mablag‘ real vaqt rejimida tushadi, undan o‘sha vaqtning o‘zida foydalanish imkoniyati vujudga keladi.
Mazkur tizim Markaziy bank tomonidan 2019-yil oxirida ishlab chiqilib, tajriba tariqasida 2020-yil 18-fevraldan ishga tushirildi hamda “Hamkorbank”, “Trastbank”, “Ipoteka bank” va “Turkistonbank” kabi tijorat banklarida sinovdan o‘tkazilmoqda. Dastlabki ikki kun davomida ushbu tizim orqali mingdan ortiq qariyb 20 milliard so‘mlik to‘lovlar amalga oshirildi.
Ma’lum qilinishicha, 2020-yilning fevral-mart oylarida respublikaning boshqa banklari ham bosqichma-bosqich ravishda “Anor” tizimiga ulanadi.
Izoh (0)