Rossiyaning Saratov elektroagregat ishlab chiqarish birlashmasi (SEIB) o‘zining asosiy mahsuloti — “Saratov” muzlatkichlarini ishlab chiqarishni to‘xtatdi. Bu haqda korxona xodimlari so‘zlariga asoslanib, Meduza xabar berdi.
Saratov viloyati sanoat va energetika vazirligida jurnalistlarga ushbu ma’lumotni tasdiqlashdi va muzlatkichlarni ishlab chiqarish “bozorda raqobatning yuqori darajasi tufayli korxona uchun norentabel bo‘lib qolgani” ma’lum qilindi.
Vazirlikda shuningdek, SEIB xususiy korxona ekanligi va ishlab chiqarish liniyasini optimallashtirish bo‘yicha qarorni mustaqil ravishda qabul qilganligi ham aytib o‘tildi.
Shu bilan birga, viloyat hukumati zavod rahbariyati bilan birgalikda Saratov elektroagregat ishlab chiqarish birlashmasining moliyaviy-iqtisodiy holatini normallashtirish variantlarini ishlab chiqmoqda.
Vazirlikda aytilishicha, zavod ishchilarining qisqartirilishi haqida hali ma’lum qilinmagan.
Saratov elektroagregat ishlab chiqarish birlashmasiga 1939-yilda asos solingan va u SSSRdagi maishiy muzlatkichlar ishlab chiqarishni boshlagan dastlabki korxonalardan biri bo‘lgan.
2016-yilda Saratov viloyati gubernatori Valeriy Radayev birlashma negizida iPhone 7 ishlab chiqarishni yo‘lga qo‘yishni taklif qilgan.
Izoh (0)