Ахборот ва оммавий коммуникациялар агентлигида 17 февраль, душанба куни, Давлат солиқ қўмитаси раҳбарияти иштирокида журналист ва блогерлар учун матбуот анжумани ташкил этилди. Унда қўмита вакиллари Солиқ кодексига киритилган ўзгартириш ва қўшимчаларга оид саволларга жавоб қайтарди.
«Дарё» мухбири Миролим Исажоновнинг хабар беришича, тадбирда журналистларнинг «Тадбиркорлар фаолияти устидан хронометраж текшируви ўтказиш жараёни қачонгача давом этади?», деган саволига ДСҚ раиси ўринбосари Фазлиддин Умаров шундай жавоб берди.
«Ўтган икки йил мобайнида Президентимиз топшириғи билан тадбиркорлик субъектида текширувлар ўтказиш қатъиян ман қилинди. Лекин бу борада мониторинг таҳлили амалга оширилган. Худди шулардан бири хронометраж тадбири эди. Бу текширув ўтган йилларда амалда бўлган қонунчиликка асосан, етти кунгача ўтказилиши мумкин эди. Хронометраж тадбиркорлик субъектида ҳақиқий савдо тушумини аниқлаш мақсадида ўтказилади. Тадбир натижаси бўйича тадбиркорларга нисбатан ҳеч қандай чора кўриш назарда тутилмаган.
Жорий йилдан бошлаб, хронометражни тўғридан-тўғри ўтказиш тартиби қонунчиликда йўқ. Бунинг ўрнига сайёр текшириш нормаси киритилди. Сайёр текшируви ичида хронометраж ҳам ўз аксини топган. 1 апрелга қадар сайёр текширувни ўтказиш бўйича меъёрий ҳужжатни ишлаб чиқиш белгиланган ва бу жараён айни пайтда давом этяпти. Шу боис бугунги кунда хронометраж ўтказиш амалиёти мавжуд эмас», — деди Фазлиддин Умаров.
Қўмита расмийсининг айтишича, шу йилнинг биринчи чораги мобайнида тадбиркор молиявий ёки маъмурий жазога тортилмайди. У йўл қўйган камчилик ва хатолар солиқчилар билан ҳамжиҳатликда бартараф этилади.
«Солиқ кодекси нормаси амалга киритилиб, солиқ тўловчиларда кўникма пайдо бўлгунга қадар, яъни биринчи чорак давомида бирорта тадбиркор фаолияти устидан назорат ўтказилмайди. Агар ишбилармоннинг ўзи хатога йўл қўйиб ва бу учун унга нисбатан маъмурий ёки молиявий жарима белгиланса, бу нормалар ҳам бекор қилинади. Хатолик юзага келса, буни солиқ тўловчи билан бирга бартараф этамиз, тушунмаганларини эса ўргатамиз», — деди раис ўринбосари.
Изоҳ (0)