Rossiya tashqi ishlar vaziri o‘rinbosari Aleksandr Pankin O‘zbekistonning Yevrosiyo iqtisodiy ittifoqiga kirish istiqbollari haqida to‘xtalib o‘tdi, deb xabar beradi “RIA Novosti”.
Diplomatning aytishicha, Shavkat Mirziyoyev 20-yanvar kuni Oliy Majlis Senatiga qilgan murojaatida O‘zbekistonning YeIIga kuzatuvchi maqomida qo‘shilishini bildirgan edi.
“Bundan kelib chiqib aytishim mumkinki, O‘zbekistonning kuzatuvchi maqomida ittifoqqa kirishi uning to‘laqonli a’zolik jarayonida qo‘yilgan birinchi qadamdir. Toshkent rasmiylari YeIIga kirishning bahs talab qilmaydigan afzalliklari – yagona tovarlar, ishchi kuchi, xizmat va kapital bozoriga chiqish imkoni yuzasidan mamnunlik bilan gapirmoqda.
Ehtimol, hamkorlarimiz mumkin bo‘lgan xarajatlarni hisoblamoqdadir. Bu normal holat. Ittifoqqa hech kim majburan jalb etilmaydi. Shubhasiz, O‘zbekistonning YeIIga qo‘shilishi Yevrosiyo integratsiyasini rivojlantirish uchun muhim qadam bo‘ladi, Toshkentning xalqaro maydondagi obro‘-e’tiborini kuchaytirishga xizmat qiladi”, — deydi vazir o‘rinbosari.
Pankin YeIIda yangi a’zolarning paydo bo‘lishi haqida gapirib, hozircha Toshkentning YeIIga qo‘shilish haqida rasmiy ariza bermaganini ta’kidlagan.
Izoh (0)