Наманганда «Антикоронавирус» махсус тактик-ўқув машқи ўтказилди. Бу ҳақда «Дарё» мухбири Азизбек Абдувалиев хабар бермоқда.
Косонсой туманидаги чегара-божхона постида ташкил этилган ўқув машқида вилоят ҳудудига ўта хавфли юқумли касалликлар, хусусан, янги коронавирус кириб келишининг олдини олишда тегишли хизматлар ҳамкорлиги, халқаро тиббий-санитария қоидаларини жорий этиш тартиби амалда синаб кўрилди. Алоқа ва марказлаштирилган хабар бериш тизими ҳамда ўзаро маълумот алмашинуви текширувдан ўтказилди.
Икки босқич — чегара-божхона постида ташкил этилган санитария-карантин пункти ва тиббиёт бирлашмасида ўтказилган машқлар давомида ўта хавфли юқумли касаллик билан оғриган шахсларни аниқлаш, ташхис қўйиш ҳамда бу ҳақда тегишли хизматларга хабар бериш, беморларга биринчи тиббий ёрдам кўрсатиш ва шифохонага эвакуация қилиш, фавқулодда вазиятлар «содир бўлган» ҳудудларда назорат ўрнатиш каби жараёнларнинг амалда бажарилиши кузатиб борилди.
Фуқаро муҳофазаси тузилмалари ва эпидемияга қарши кураш гуруҳлари билан уларнинг тайёргарлиги юзасидан савол-жавоблар, суҳбатлар ўтказилди. Машқ якунида эса йўл қўйилган камчиликлар ва хатоларни бартараф этиш бўйича фикр алмашилди.
Вилоят фавқулодда вазиятлар бошқармаси ахборот хизмати раҳбари Қаҳрамон Сатторовга кўра, тадбирга жами 250 киши ва 26 та техника жалб этилди.
Икки соат давом этган машқ мобайнида масъул хизматлар тузилмалари шахсий таркибининг ҳаракатлари ҳамда бириктирилган махсус асбоб-анжом ва ҳимоя воситаларидан фойдаланиш кўникмалари такомиллаштирилди. Ўта хавфли юқумли касалликлар билан боғлиқ фавқулодда вазиятларда ҳамкорликда ҳаракат қилиш даражаси қониқарли баҳоланди.
Изоҳ (0)