Oliy Majlis Senatining 2019-yil 12-oktabrda bo‘lib o‘tgan yalpi majlisida O‘zbekiston sudyalarining maxsus kiyimi —mantiya tavsifi va namunasi tasdiqlangandi.
Mamlakatda sudyalarning maxsus kiyimi tasdiqlanishi xalqaro tamoyillarning milliy qonunchilikka joriy etilishi, sud hokimiyatining nufuzi oshishi, qolaversa, “Sudlar to‘g‘risida”gi qonun talabini amalda ijro etilishini bildiradi.
Ushbu qonunning 84-moddasida sudyalar sud majlisini maxsus kiyimda olib borishi belgilangan.
Shunga muvofiq, joriy yil fevral oyidan boshlab mamlakatda faoliyat yuritayotgan barcha sudyalar maxsus kiyim — mantiya kiygan holda ish olib boradi.
Mantiya faqat sud zallarida kiyiladi va uni sayyor sud majlislarida kiyish taqiqlangan.
“Daryo” muxbiri Azizbek Abduvaliyevning xabar berishicha, mazkur qonunchilik hujjatlarida belgilangan tartib respublikada birinchi bo‘lib Fuqarolik ishlari bo‘yicha Namangan viloyati sudi tizimida joriy etildi. Viloyat sudi raisi Abdurahmon Safoyev ilk bor mantiya kiyib, oilaviy nizo bilan bog‘liq birinchi instansiya ishini ko‘rdi.
Ma’lumot uchun, o‘tgan yili mazkur sudda ko‘rilgan fuqarolik nizolari soni 2018-yilga nisbatan 862 taga yoki 6,4 foizga kamaydi. Nikohdan ajratish to‘g‘risida kelib tushgan arizalar 194 ta, ko‘rilgan ishlar 304 ta, nikohdan ajratilgan ishlar soni esa 56 taga kamaygan.
Izoh (0)