Xitoyning murakkab epidemik vaziyat hukm surayotgan Uxan shahridan 84 nafar O‘zbekiston fuqarosining mamlakatga olib kelingani xabar berilgan edi. Kazinform’ning Qozog‘iston Tashqi ishlar vazirligiga tayanib xabar berishicha, ular orasida 5 nafar Qozog‘iston fuqarosi ham bor.
“Qozog‘iston tomonining iltimosiga ko‘ra, bugun tunda Xitoyning Uxan shahridan Rossiya va O‘zbekistonning maxsus bortlarida 8 nafar Qozog‘iston fuqarosi evakuatsiya qilindi. Besh nafar fuqaro Toshkent shahrida ikki hafta davomida shifokorlar nazorati ostida bo‘lishadi, qolgan uchalasi Tyumen shahrida bo‘lishadi”, — deyiladi xabarda.
TIV matbuot xizmatining ma’lum qilishicha, evakuatsiya qilinganlar orasida harorati ko‘tarilishi bois XXR epidemiologik xizmatlari tomonidan chiqarilmay kelgan Yanszi universiteti 1-kurs talabasi ham bor.
“Samolyotga chiqish oldidan Qozog‘iston fuqarolari qo‘shimcha tibbiy tekshiruvdan o‘tkazildi, hech kimda isitma yoki koronavirus simptomlari aniqlanmagan”, — deyiladi xabarda.
Eslatib o‘tamiz, Xitoydagi O‘zbekiston fuqarolarini evakuatsiya qilish bo‘yicha dastlabki charter reys 4-fevral, seshanba kuni, soat 17:20 da Pekin—Toshkent yo‘nalishi bo‘yicha 251 nafar O‘zbekiston fuqarosini olib kelgan edi. Ularda koronavirus aniqlanmagani aytildi.
Izoh (0)