Андижонлик Жасурбек Ҳамроқулов Андижон шаҳар 6-сон ИИБ профилактика инспектори Сардор Абдуманнопов томонидан 2019 йил 11 сентябрь куни ИИБ биносида калтаклангани ҳақида хабар берилган эди. Кейинроқ Ўзбекистон Ички ишлар вазирлиги мазкур ҳолат юзасидан маълумот бериб, ушбу ҳолат Андижон вилоятининг прокуратура органлари томонидан атрофлича ўрганиб чиқилиб, Жиноят процессуал кодексининг 388-моддаси тартибида суд муҳокамасига юборилгани ҳақида хабар берган эди.
Ўзбекистон Бош прокуратураси томонидан «Дарё»га маълум қилинишича, 2019 йил 12 октябрь куни Андижон шаҳар прокурори томонидан фуқаро Ҳамрақулов Жасурбек Бахтиярович ҳамда бошқаларга нисбатан Ўзбекистон Республикаси Жиноят кодексининг 219-моддаси 1-қисми билан жиноят иши қўзғатилган.
Бош прокуратура томонидан хабар берилишича, 2019 йил 11 сентябрь куни соат тахминан 22:00 да Андижон шаҳар ИИО ФМБ 6-сонли ИИБ бўлинмаси профилактика инспектори Сардор Абдуманнопов тунги хизматни олиб бораётган вақтида унга телефон орқали Андижон шаҳрида жойлашган «Камелот» номли кафеда фуқаролар шовқин-сурон қилиб, тинчлик бермаётганлиги тўғрисида кафенинг юқори қаватида яшовчи фуқаролардан мурожаат келиб тушган.
Бош прокуратура хабарига кўра, келиб тушган мурожаат асосида инспектор воқеа жойига етиб борганида, кафе ичида фуқаро Жасурбек Ҳамроқулов маст ҳолда фуқаро О.Болтабоева билан жанжаллашиб, унинг юзига бир мушт урганлиги маълум бўлган. ИИБ ходими уларни тинчлантириш учун кафе биносидан ташқарига олиб чиққан ҳамда ушбу ер жамоат жойи эканлигини, фуқароларнинг тинчлигини бузмаслиги кераклигини айтганда, фуқаро Жасур Ҳамроқулов унга бўйсунишни хоҳламаган. Жасур Ҳамроқулов инспекторнинг қонуний талабларини бажаришдан бўйин товлаб, унга фаол қаршилик кўрсатган ҳамда ходимнинг эгнида бўлган хизмат кийимидаги погонини юлиб олган.
Қайд этилишича, суд-тиббий экспертизасининг 2019 йил 22 сентябрдаги хулосасига кўра, Жасур Ҳамроқуловнинг бурун, бўйин, ўнг қўл кафтига ва чап қўл елкасига тан жароҳати етказилган.
2020 йилнинг 9 январь куни Жасур Ҳамроқуловга нисбатан мазкур жиноят иши юзасидан Жиноят кодексининг 219-моддаси 1-қисми, 277-моддаси 2-қисми «г» банди билан айб эълон қилиниб, унга нисбатан муносиб хулқ-атворда бўлиш ҳақида тилхат эҳтиёт чораси қўлланилган.
Дастлабки тергов давомида ҳодиса содир бўлган куни Андижон шаҳар ИИО ФМБ 6-сонли ИИБ бўлинмасида содир бўлган ҳолат тасвирга туширилган кузатув камераларидаги видеоёзувлар, фуқаро Жасур Ҳамроқулов билан Сардор Абдуманнопов ўртасида бўлиб ўтган суҳбат ёзиб олинган аудиоёзувлар, иш бўйича тайинланган стенограмманинг баённомаси ёзма далил деб эътироф этилган.
Юқоридагиларга асосан Андижон шаҳар прокуратураси томонидан ишнинг инспектор Сардор Абдуманноповга тегишли бўлган қисми тергов муҳокамасидан чиқариб тугатилган.
Мазкур жиноят иши 2020 йил 11 январь куни мазмунан кўриб чиқиш учун айблов хулосаси билан Жиноят ишлари бўйича Андижон шаҳар судига юборилган.
Ҳозирда жиноят иши суд муҳокамасида кўриб чиқилмоқда.
Изоҳ (0)