AQSh Kongressining Vakillar palatasida mamlakat prezidenti Donald Trampga qarshi impichment bo‘yicha asosiy ayblovchi, demokrat Adam Shiffning gumon qilishicha, AQSh yetakchisi saylovlar vaqtida yordam evaziga Alyaskani Rossiyaga berishi mumkin. Bu haqda Breitbart xabar berdi.
Shiffning fikriga ko‘ra, agar Tramp aybsiz deb tan olinsa, bu uni qabul qilib bo‘lmaydigan harakatlarga boshlashi mumkin. Vakillar palatasi vakilining so‘zlariga ko‘ra, Tramp keyingi saylovlarda ko‘mak evaziga Rossiyaga Alyaskani taklif qilishi yoki u xususiy qarorgohga ko‘chib o‘tib, mamlakat boshqaruvini kuyovi Jared Kushnerga topshirishi mumkin.
Trampga qarshi impichment bo‘yicha mamlakat Senatida yakuniy ovoz berish 5-fevral, chorshanba kuni, mahalliy vaqt bilan soat 16:00 da boshlanadi.
AQSh Senati 1-fevral, shanba kuni, impichment ishida guvohlarni chaqirishga qarshi ovoz bergan. 49 nafar senator guvohlarning ishtirokini qo‘llab-quvvatladi, 51 kishi bunga qarshi chiqdi. Yangi guvohlarni chaqirish tashabbusi demokratlar tomonidan ilgari surildi. Bungacha ular AQSh Kongressining quyi palatasida prezidentni lavozimidan chetlatishga ovoz bergan. Endi yakuniy qaror yuqori palatada — respublikachilar ko‘pchilik bo‘lgan Senatda qabul qilinadi.
Ma’lumot uchun, Alyaskani sotish to‘g‘risidagi qaror 1866-yil 16-dekabrda imperator Aleksandr II, moliya vazirlari va dengiz vazirligi, shuningdek, Rossiyaning Vashingtondagi elchisi Eduard Andreevich Stekl tomonidan qabul qilingan. 1,5 million kvadrat kilometrdan ortiq maydon 7,2 million oltin dollarga sotilgan.
Izoh (0)