Xitoy tomonidan koronavirus tarqalishiga qarshi ko‘rilayotgan keskin choralar spirtli ichimliklar savdosining qisqarishiga olib kelishi mumkin. Bu haqda Moody’s xalqaro reyting agentligi ekspertlari ma’lum qildi, deb yozmoqda “RBK”.
Agentlik ekspertlarining qayd etishicha, koronavirus Yevropaning spirtli mahsulotlar ishlab chiqaruvchi yirik kompaniyalarining moliyaviy ko‘rsatkichlari uchun jiddiy xavf tug‘dirmoqda. Agentlik hisobotida aytilishicha, infeksiyaning tarqalishi Oy kalendari bo‘yicha Xitoyda Yangi yil nishonlanadigan davr arafasida boshlandi. Aynan shu vaqtda mamlakatda spirtli ichimliklar iste’moli eng yuqori darajaga ko‘tariladi.
Ekspertlarning ta’kidlashicha, ko‘p millionli aholiga ega shaharlarning karantin uchun yopilishi va safarlarga cheklov qo‘yilishi spirtli mahsulotlarga bo‘lgan talabga salbiy ta’sir ko‘rsatadi. Shuningdek, Xitoyga keladigan sayyohlar va chet davlatlariga boradigan xitoylik sayyohlar sonining kamayishi hamda ko‘plab aviareyslarning bekor qilinishi ham talabga qo‘shimcha ta’sir ko‘rsatadi.
Tahlilchilar fikriga ko‘ra, salbiy ta’sirlar keyingi oylarda ham kuzatilishi mumkin, chunki xitoylik distribyutorlar uchun o‘z zaxiralarini to‘ldirish qiyin bo‘ladi.
Qayd etilishicha, Fransiyaning Rémy Cointreau kompaniyasi jiddiy zarar ko‘rishi mumkin. Kompaniya o‘z mahsulotlarining 20 foizini Xitoyga yetkazib beradi. Shuningdek, Fransiyaning Pernod Ricard va Buyuk Britaniyaning Diageo kompaniyalari ham jiddiy yo‘qotishlarga uchrashi mumkin. Ular o‘z mahsulotlarining mos ravishda 10 va 5 foizini Xitoyga yetkazib beradi.
Eslatib o‘tamiz, Xitoyda koronavirus tarqalishi sharoitida birja savdolari 8 foizlik pastlash bilan boshlandi. Brent turidagi neft narxi 13 oy mobaynidagi eng past ko‘rsatkichga tushdi. Makaoda koronavirus tufayli barcha kazinolar yopiladi.
Izoh (0)