Qashqadaryoda ikki Damas to‘qnashdi. YPX xodimi yonayotgan Damas’dan yo‘lovchilarni olib chiqdi, qurbonlar bor (video, foto)

Qashqadaryoning Qarshi tumani hududida 25-sentabr kuni ikkita Damas ishtirokida yirik yo‘l-transport hodisasi sodir bo‘ldi. Voqea ustidan chiqqan YPX xodimi alanga ichidagi yo‘lovchilarni qutqardi.

Viloyat Yo‘l harakati xavfsizligi boshqarmasi axborot xizmati rahbari Javlon Baxtiyevning “Daryo”ga ma’lum qilishicha, voqea soat chamasi 8:00 da, Xonobod qishlog‘idan chiquvchi ikkinchi darajali yo‘lning “Qarshi—Shahrisabz” yo‘liga tutash qismida yuz bergan.

— Qarshi tumani Xonobod qishlog‘ida yashovchi 1997-yilda tug‘ilgan Q.A. boshqaruvidagi Damas “Xonobod—Qarshi” yo‘nalishi bo‘yicha harakatlanib borayotganda, qarama-qarshi tomondan kelayotgan fuqaro E.H. boshqaruvidagi Damas bilan to‘qnashgan va yong‘in kelib chiqqan, — deydi Javlon Baxtiyev.

Ma’lum qilinishicha, ushbu hududdagi yashash manzilidan ishga otlangan viloyat YHXB xodimi Nizomiddin Normo‘minov voqea ustidan chiqqan va yonayotgan Damas’lardan biridagi to‘rt nafar yo‘lovchini qutqargan.

Viloyat IIB matbuot xizmatining qo‘shimcha qilishicha, YTH oqibatida jabrlanganlar va vafot etganlar bor. Holat yuzasidan tergov-surishtiruv jarayonlari boshlangan.