МИБ Балиқчида 6,9 млрд сўмлик газ талон-торож қилинганини аниқлади
Мажбурий ижро бюроси Андижон вилояти Балиқчи туманида 6 миллиард сўмлик табиий газ талон-торож қилинганини аниқлади. Бу ҳақда «Дарё»га Мажбуий ижро бюроси маълум қилди.
Хабар берилишича, Мажбурий ижро бюроси Андижон вилояти бошқармаси томонидан фуқаролар М.Ж. ва С.Х.ни Жиноят кодексининг 185-2-моддаси 4-қисми билан айблаш ҳақидаги жиноят иши бўйича суриштирувда «Ўзтрансгаз» Андижон ҳудудий газ таъминоти филиали 6-сон Шаҳрихон туманлараро участкаси Балиқчи туман бўлими фаолиятини тафтиш қилиш тайинланган.
Тафтишда мазкур бўлим бошлиқлари Д.Х. ва О.А. 2018—2019 йилларда ўз хизмат вазифалари юзасидан бажариши лозим ёки мумкин бўлган ҳаракатларни қасддан бажармасдан келганлиги аниқланган.
Жумладан, туманда ўрнатилган юқори ва ўрта босимли 294 та газ тақсимлаш қурилмаларидан 80 таси 2018—2019 йилларда тафтишдан ўтказилмаган, табиий газ ҳисоблагичларининг кўрсаткичлари ҳар ойда ҳисоботларга киритиб борилмаган, газ тақсимлаш қурилмаларида йўқотилган табиий газнинг йўқотиш ҳажмларини аниқлаш чоралари кўрилмаган.
М.Ж. ва бошқалар томонидан талон-торож қилинган 3,6 миллион метр куб табиий газ бўйича суд ҳукми чиқарилган бўлса-да, талон-торож қилинган ушбу табиий газ ҳажмлари ҳисоботдан чиқариб ташланмаган.
Натижада туманга 2018 йил ва 2019 йилнинг 9 ойида аҳоли ва бошқа истеъмолчилар учун олинган жами 63,6 миллион метр куб табиий газ билан ҳисоботда қайд этилган табиий газ ўртасида 6,9 миллиард сўмлик табиий газ тафовути келиб чиққан.
Фуқаро Д.Х.га зарарнинг 2,7 миллиард сўмлик, О.А.га 4,2 миллиард сўмлик қисми тўғри келган.
Мазкур ҳолатлар юзасидан Мажбурий ижро бюроси Андижон вилоят бошқармаси томонидан 2020 йил 28 январда Д.Х. ва О.А.га нисбатан Жиноят кодексининг 208-моддаси билан жиноят иши қўзғатилиб, терговга тегишлилик масаласини ҳал этиш учун вилоят прокуратурасига юборилган.
