Kecha, 30-yanvar kuni, Prezident huzuridagi Strategik va mintaqalararo tadqiqotlar institutida “Diniy e’tiqod erkinligining kafolatlari — ochiq fuqarolik jamiyatining muhim asosi” mavzusida davra suhbati bo‘lib o‘tdi. Unda turli diniy konfessiya vakillari, IIV, TIV, Adliya vazirligi, Din ishlari bo‘yicha qo‘mita, diplomatik korpus vakillari, Strategik va mintaqalararo tadqiqotlar instituti mutaxassislari va OAV vakillari ishtirok etdi.
“Sof.uz”ning xabar berishicha, davra suhbatidan so‘ng mas’ullar OAV vakillari tomonidan berilgan savollarga javob bergan. Xususan, AQSh elchixonasi xodimiga “O‘zbekiston xalqaro hamjamiyat tarafidan diniy erkinliklar cheklangan davlatlar ro‘yxatida ekanligini qayd etdingiz. Lekin bugungi suhbatda faqat yaxshi tarafga o‘zgarishlar bo‘layotgani haqida gapirishdi. Sizningcha, bizda diniy huquq-erkinliklarning cheklanishini nimalarda ko‘rishimiz mumkin?” deya savol berilgan.
AQSh elchixonasi vakili savolga “Bular diniy tashkilotlarni ro‘yxatga olish bilan bog‘liq”, deya javob berdi. Muxbirning “Faqat shu bilanmi?” degan savoliga elchixona xodimi “Yo‘q, yana boshqalar ham bor”, deya javob bergan.
Shundan so‘ng Strategik va mintaqalararo tadqiqotlar instituti bo‘lim boshlig‘i, islomshunos Baxtiyor Bobojonov muxbirga “Siz nimaga shama qilayotganingizni tushunib turibman, ‘Malika’ bozoridagi yigitlarni olib kirib, soqollarini majburiy olishganini nazarda tutayotgan bo‘lsangiz, bu juda yomon va sharmandali ish edi. Bu ishni qilganlar o‘shandayoq jazolangan, hammada ham xato va kamchiliklar bo‘ladi”, deya qo‘shimcha qilgan.
IIB Terrorizm va ekstremizmga qarshi kurash bosh boshqarmasi boshlig‘i o‘rinbosari esa Malika bozorida yigitlarning soqolini majburiy olganlar jazolanganini tasdiqlab, bundan buyon IIV xodimlari tomonidan bunday noqonuniy xatti-harakatlar qilinmasligini aytgan. Lekin vakolatiga kirmagani uchun jazolanganlar kimlar ekanligini aytolmasligini bildirgan.
Izoh (0)