Joriy yil 21-yanvar kuni Rossiyaning Tomsk viloyatida 12 nafar o‘zbekistonlik yong‘in oqibatida halok bo‘lgan, 2 nafari tirik qolgani haqida xabar qilingandi. 26-yanvarida fojiada halok bo‘lgan 10 nafar marhumning jasadi olib kelingan, qolgan ikki nafarining shaxsiga oydinlik kiritilishi lozim edi. Bu haqda “Kun.uz” xabar bermoqda.
30-yanvarda ushbu fojiada tirik qolgan ikki o‘zbekistonlik hamda ikki marhum jasadi ham O‘zbekistonga olib kelindi. DNK natijalariga ko‘ra, olib kelingan marhumlardan biri kitoblik Shuhrat Rahmonov ekani ma’lum qilindi. Namangan aeroportiga keltirilgan ikkinchi marhum Muzaffar Mamajonovning jasadi Andijon viloyatiga jo‘natilgan.
Tergov jarayoni sababli tirik qolgan jabrlanuvchilar — navoiylik N.M. hamda R.D. bilan uchrashish imkoni bo‘lmadi.
Marhumlar jasadlari va fuqarolar Respublika Favqulodda vaziyatlar, Ichki ishlar, Bandlik va mehnat munosabatlari, Sog‘liqni saqlash vazirliklari, Tashqi mehnat migratsiyasi agentligi va Milliy aviakompaniya hamkorligida olib kelingan.
“Halok bo‘lgan mehnat migrantlarining jasadlarini olib kelish Tashqi mehnat migratsiyasi agentligi huzurida tashkil etilgan maxsus jamg‘arma hisobidan qoplanadi. Biroq Rossiya ijtimoiy tarmoqlarida Tomsk fojiasi qurbonlari uchun noma’lum kishilar tomonidan pul yig‘ish holatlari kuzatilmoqda. Shu munosabat bilan o‘zbekistonliklarni firibgarlar aldovidan ehtiyot bo‘lishga chaqirib qolamiz”, — deyiladi xabarda.
Izoh (0)