Кеча, 30 январь куни, Президент ҳузуридаги Стратегик ва минтақалараро тадқиқотлар институтида «Диний эътиқод эркинлигининг кафолатлари — очиқ фуқаролик жамиятининг муҳим асоси» мавзусида давра суҳбати бўлиб ўтди. Унда турли диний конфессия вакиллари, ИИВ, ТИВ, Адлия вазирлиги, Дин ишлари бўйича қўмита, дипломатик корпус вакиллари, Стратегик ва минтақалараро тадқиқотлар институти мутахассислари ва ОАВ вакиллари иштирок этди.
«Sof.uz»нинг хабар беришича, давра суҳбатидан сўнг масъуллар ОАВ вакиллари томонидан берилган саволларга жавоб берган. Хусусан, АҚШ элчихонаси ходимига «Ўзбекистон халқаро ҳамжамият тарафидан диний эркинликлар чекланган давлатлар рўйхатида эканлигини қайд этдингиз. Лекин бугунги суҳбатда фақат яхши тарафга ўзгаришлар бўлаётгани ҳақида гапиришди. Сизнингча, бизда диний ҳуқуқ-эркинликларнинг чекланишини нималарда кўришимиз мумкин?» дея савол берилган.
АҚШ элчихонаси вакили саволга «Булар диний ташкилотларни рўйхатга олиш билан боғлиқ», дея жавоб берди. Мухбирнинг «Фақат шу биланми?» деган саволига элчихона ходими «Йўқ, яна бошқалар ҳам бор», дея жавоб берган.
Шундан сўнг Стратегик ва минтақалараро тадқиқотлар институти бўлим бошлиғи, исломшунос Бахтиёр Бобожонов мухбирга «Сиз нимага шама қилаётганингизни тушуниб турибман, ‘Малика’ бозоридаги йигитларни олиб кириб, соқолларини мажбурий олишганини назарда тутаётган бўлсангиз, бу жуда ёмон ва шармандали иш эди. Бу ишни қилганлар ўшандаёқ жазоланган, ҳаммада ҳам хато ва камчиликлар бўлади», дея қўшимча қилган.
ИИБ Терроризм ва экстремизмга қарши кураш бош бошқармаси бошлиғи ўринбосари эса Малика бозорида йигитларнинг соқолини мажбурий олганлар жазоланганини тасдиқлаб, бундан буён ИИВ ходимлари томонидан бундай ноқонуний хатти-ҳаракатлар қилинмаслигини айтган. Лекин ваколатига кирмагани учун жазоланганлар кимлар эканлигини айтолмаслигини билдирган.
Изоҳ (0)