O‘zbekiston elchisi Baxtiyor Saidov 29-yanvar, chorshanba kuni, Xitoy Xalq Respublikasi Tashqi ishlar vazirligi Yevropa va Markaziy Osiyo departamenti direktori Sun Linszyan bilan uchrashgan. Bu haqda O‘zbekiston Tashqi ishlar vazirligi ma’lum qildi.
Uchrashuvda chet el fuqarolarining Xubey provinsiyasidagi Uxan shahridan evakuatsiya qilish bilan bog‘liq masalalar muhokama qilingan. Xitoylik diplomat mamlakat hukumatining koronavirus tarqalishini chegaralash hamda infeksiyani profilaktika qilish va davolash borasida ko‘rayotgan har tomonlama choralari to‘g‘risida ma’lumot bergan.
Ta’kidlanishicha, hozirda Jahon sog‘liqni saqlash tashkiloti (JSST) bosh direktori Tedros Adhanom Gebreyesus boshchiligidagi ishchi guruh Xitoyda bo‘lib turibdi. JSST bosh direktori ham chet el fuqarolarini evakuatsiya qilishning maqsadga muvofiq emasligi to‘g‘risidagi tashkilot pozitsiyasini ma’lum qildi, xalqaro jamoatchilikni xotirjamlikni saqlash va yolg‘on xabarlarga ahamiyat bermaslikka chaqirdi.
TIV yanvar oyida Uxan shahridan O‘zbekistonga qaytib kelgan o‘zbekistonlik talabalardan zudlik bilan O‘zbekiston Sog‘liqni saqlash vazirligi huzuridagi Sanitariya-epidemiologik osoyishtalik agentligiga +998909882330 (direktor o‘rinbosari B.Qurbonov), +998972755074 (bosh mutaxassis F.Qurbonbekov) telefon raqamlari orqali bog‘lanishni so‘raydi.
Vazirlikning ma’lum qilishicha, Xitoy hududidagi O‘zbekiston fuqarolari zarur holatlarda istalgan vaqtda mamlakatning Pekin shahridagi elchixonasiga +86 135 1102-4242 (Bobur Yahyoyev), +86 139 1175-4476 (Shuhrat Umirov) telefon raqamlari orqali hamda Shanxay shahridagi Bosh konsulxonasiga +86 131 2255-5772 (Aziz Ulug‘bekov) telefon raqami orqali murojaat qilishi mumkin.
O‘zbekiston Senati Xitoyning murakkab epidemik vaziyat hukm surayotgan hududida 72 nafar o‘zbekistonlik talaba mavjudligini ma’lum qilgan edi.
28-yanvar, seshanba kuni, O‘zbekiston bosh vaziri Abdulla Aripov mamlakatga Xitoyda tarqalgan yangi turdagi koronavirus kirib kelishining oldini olish masalalariga bag‘ishlangan yig‘ilish o‘tkazgan.
Avvalroq O‘zbekiston sog‘liqni saqlash vazirining birinchi o‘rinbosari Bahodir Yusupaliyev koronavirusning O‘zbekistonga kirib kelishining oldini olish bo‘yicha qilinayotgan ishlar xususida ma’lumot bergan edi.
Shuningdek, Sog‘liqni saqlash vazirligi koronavirusning O‘zbekistonga kirib kelgani haqidagi gap-so‘zlarni inkor etgan edi. O‘zbekiston Tashqi ishlar vazirligi fuqarolarga Xitoyga xizmat, turistik va boshqa maqsadlarda tashrif buyurishdan tiyilib turishni tavsiya qilgan edi.
Eslatib o‘tamiz, shu kunga qadar AQSh va Yaponiya Uxandagi o‘z fuqarolarini evakuatsiya qildi. Yaponiya evakuatsiyani davom ettirish maqsadida Uxanga yana ikkita samolyot jo‘natishni rejalashtirmoqda. Shuningdek, Avstraliya hukumati koronavirus qayd etilgan Xubey provinsiyasidan o‘z fuqarolarini olib chiqib ketishga va’da bergan.
Izoh (0)