Ўзбекистон элчиси Бахтиёр Саидов 29 январь, чоршанба куни, Хитой Халқ Республикаси Ташқи ишлар вазирлиги Европа ва Марказий Осиё департаменти директори Сун Линсзян билан учрашган. Бу ҳақда Ўзбекистон Ташқи ишлар вазирлиги маълум қилди.
Учрашувда чет эл фуқароларининг Хубэй провинциясидаги Ухань шаҳридан эвакуация қилиш билан боғлиқ масалалар муҳокама қилинган. Хитойлик дипломат мамлакат ҳукуматининг коронавирус тарқалишини чегаралаш ҳамда инфекцияни профилактика қилиш ва даволаш борасида кўраётган ҳар томонлама чоралари тўғрисида маълумот берган.
Таъкидланишича, ҳозирда Жаҳон соғлиқни сақлаш ташкилоти (ЖССТ) бош директори Тедрос Адҳаном Гебреесус бошчилигидаги ишчи гуруҳ Хитойда бўлиб турибди. ЖССТ бош директори ҳам чет эл фуқароларини эвакуация қилишнинг мақсадга мувофиқ эмаслиги тўғрисидаги ташкилот позициясини маълум қилди, халқаро жамоатчиликни хотиржамликни сақлаш ва ёлғон хабарларга аҳамият бермасликка чақирди.
ТИВ январь ойида Ухань шаҳридан Ўзбекистонга қайтиб келган ўзбекистонлик талабалардан зудлик билан Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлигига +998909882330 (директор ўринбосари Б.Қурбонов), +998972755074 (бош мутахассис Ф.Қурбонбеков) телефон рақамлари орқали боғланишни сўрайди.
Вазирликнинг маълум қилишича, Хитой ҳудудидаги Ўзбекистон фуқаролари зарур ҳолатларда исталган вақтда мамлакатнинг Пекин шаҳридаги элчихонасига +86 135 1102-4242 (Бобур Яҳёев), +86 139 1175-4476 (Шуҳрат Умиров) телефон рақамлари орқали ҳамда Шанхай шаҳридаги Бош консулхонасига +86 131 2255-5772 (Азиз Улуғбеков) телефон рақами орқали мурожаат қилиши мумкин.
Ўзбекистон Сенати Хитойнинг мураккаб эпидемик вазият ҳукм сураётган ҳудудида 72 нафар ўзбекистонлик талаба мавжудлигини маълум қилган эди.
28 январь, сешанба куни, Ўзбекистон бош вазири Абдулла Арипов мамлакатга Хитойда тарқалган янги турдаги коронавирус кириб келишининг олдини олиш масалаларига бағишланган йиғилиш ўтказган.
Аввалроқ Ўзбекистон соғлиқни сақлаш вазирининг биринчи ўринбосари Баҳодир Юсупалиев коронавируснинг Ўзбекистонга кириб келишининг олдини олиш бўйича қилинаётган ишлар хусусида маълумот берган эди.
Шунингдек, Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган эди. Ўзбекистон Ташқи ишлар вазирлиги фуқароларга Хитойга хизмат, туристик ва бошқа мақсадларда ташриф буюришдан тийилиб туришни тавсия қилган эди.
Эслатиб ўтамиз, шу кунга қадар АҚШ ва Япония Ухандаги ўз фуқароларини эвакуация қилди. Япония эвакуацияни давом эттириш мақсадида Уханга яна иккита самолёт жўнатишни режалаштирмоқда. Шунингдек, Австралия ҳукумати коронавирус қайд этилган Хубэй провинциясидан ўз фуқароларини олиб чиқиб кетишга ваъда берган.
Изоҳ (0)