Тошкент вилояти Оҳангарон туманлараро иқтисодий суди 24 январь, жума куни Ангрен прокуратурасининг «Янгиобод» сайёҳлик базасини мажбурий баҳолашни амалга ошириш тўғрисидаги даъвосини қаноатлантирди. Бу ҳақда сайёҳлик базаси эгаси Али Тўхтаевнинг сўзларига асосланиб, «Gazeta.uz» хабар берди.
2019 йил январь ойида Тошкент вилояти ҳокимлиги «жамоат ва давлат эҳтиёжлари учун» сайёҳлик базасини мусодара қилмоқчи эканлиги маълум бўлди.
Март ойида сайёҳлик базаси эгаси вилоят маъмуриятининг қарори устидан судга шикоят қилишга уриниб кўрди, аммо Нурафшон шаҳар маъмурий суди ҳокимнинг қарорини бекор қилишни рад этди.
Апрель ойида Тошкент вилояти маъмурий судининг апелляция инстанцияси судлов ҳайъати ҳокимликнинг сайёҳлик базаси бўйича ҳукуматнинг «махфий» буйруғини судга тақдим этишдан бош тортганига қарамай, қарорни ўзгаришсиз қолдирди.
2020 йилнинг январь ойи бошида Ангрен прокуратураси судга мурожаат қилиб, даъво аризасида сайёҳлик базасидан ўз ҳисобидан 10 гектар ер участкаси ва у ерда жойлашган бино ва иншоотларни баҳолашни амалга ошириш ва тадбиркор мол-мулкини вилоят ҳокимлиги балансига ўтказиш учун баҳолаш натижаларини ҳокимликка тақдим этишни сўраган.
Суд қарорига муносабат билдирар экан тадбиркор ҳукумат бир томондан туризмни ривожлантиришни талаб қилаётгани, бошқа томондан эса тадбиркорга тегишли мол-мулкни давлат эҳтиёжлари учун олиб қўйилаётганини айтган. У ўз фикрини Вазирлар Маҳкамасининг Тошкент вилоятида «Олтин ҳалқа» туристик зонасини ташкил этиш тўғрисидаги янги қарори билан изоҳлайди. Ушбу қарорда Ангрен тумани ҳам тилга олинади.
«Биз судда ҳокимиятнинг талаби ноқонуний эканлигини тушунтирдик. Шунингдек, 1 январдан бошлаб ерларни давлат фойдасига мусодара қилиш тартиби ўзгарганини айтдик. Вазирлар Маҳкамасининг Тошкент вилоятида «Олтин ҳалқа» туристик зонасини ташкил этиш тўғрисидаги янги қарори чиқди, у ерга Ангрен тумани ҳам киритилган. Биздан туризмни ривожлантиришимизни талаб қилишмоқда. Шундай экан, нима учун ҳокимимиз ва Ангрен прокуратураси Президент кўрсатмаларига зид иш тутмоқда?», — дейди тадбиркор.
Унинг сўзларига кўра, навбатдаги суд мажлисида Тошкент вилояти ҳокимлиги сайёҳлик базасини мусодара қилиш тўғрисидаги Вазирлар Маҳкамаси фармойиши кўрсатилмаган.
«Бизга бу ҳужжатни ҳеч ким кўрсатмади. Чунки агар кўрсатишса, ҳаммаси чиппакка чиқади. Махфий топшириқ йўқ. Уни ҳеч ким кўрмаган. Судда биз ‘Ўзингиз махфий топшириқни кўрдингизми?’, деб савол бердик. ‘Йўқ’ деб жавоб беришди. Ҳозир эса Ангрен ҳокимлиги ва прокуратураси бизни мол-мулкни баҳолатиш ва уни ҳокимликка сотишга мажбурламоқда», — дейди тадбиркор.
Сайёҳлик базаси ҳуқуқшуноси Азимжон Раҳматовнинг маълум қилишича, ҳокимлик судга 2019 йил 15 январда Али Тўхтаев билан ер участкасини давлат ҳисобига ўтказиш юзасидан учрашгани тўғрисидаги баённомани тақдим этган.
«Аслида эса Али Тўхтаев ушбу мажлисда иштирок этмаган, лекин уни иштирокчи сифатида қайд этишган», — дейди у.
Ҳуқуқшуноснинг таъкидлашича, ер участкасини мусодара қилиш тўғрисидаги Ангрен ҳокимиятининг 2019 йил 31 январдаги қарори ҳам сайёҳлик базаси эгасига йўналтирилмаган.
«Прокуратура мол-мулкни баҳолаб, унинг натижаларини ҳокимликка топшириш мажбуриятини юклади. Бундан ташқари, сайёҳлик базаси эгаси ҳисобидан баҳолашни амалга ошириш ва Ангрен ҳокимлигига мол-мулкни ўтказиш бўйича қўшимча даъво талаблари эълон қилинди. Барча талаблар суд томонидан маъқулланди», — деди сайёҳлик базаси вакили.
Азимжон Раҳматов, шунингдек, суд Олий судга назорат шикояти берилганига қарамасдан (сайёҳлик базаси апелляция шикояти рад этилгандан кейин) суд жараёнини кечиктиришга рухсат бермаганлигини маълум қилди.
«Олий суд ишни икки ой давомида кўриб чиқади ва судья назорат протестини эълон қилиши ёки рад этиши юзасидан қарор қабул қилади. Шикоятни кўриб чиқиш муддати ҳали тугамади», — дейди ҳуқуқшунос.
«Янгиобод. Чотқол марвариди» сайёҳлик базаси эгаси Али Тўхтаев Оҳангарон туманлараро иқтисодий суди қарори устидан шикоят қилишни режалаштирмоқда.
Изоҳ (0)