Siz suratda ko‘rib turgan bolakayning ismi Shohruxxon. Navoiy shahrida tug‘ilgan. Hozir sakkiz yoshda.
Shohruxxon o‘tgan yili baxtsiz hodisa tufayli daraxtdan yiqilib, chap oyog‘ining boldir suyagi sinib, og‘ir jarohat olgan. 2019-yilda zudlik bilan operatsiya qilinib, beshtalik burama mix va plastinka qo‘yilgan. Ayni vaqtda burama mix va plastinka qimirlab, singan joyi yaxshi bitmay qolgan. Oyog‘ining singan joyi qayta shamollab, shishlar paydo bo‘lgan va yiringlagan.
Shifokorlarning aytishicha, bemorning oyog‘ini qayta operatsiya qilib, uning boldir suyagining singan joyiga sakkiztalik burama mix plastinka va qayta qimirlamasligi uchun shina qo‘ydirish zarur. Ikkita jarrohlik amaliyotini o‘tkazish uchun esa 20 milion so‘m mablag‘ kerak.
“O‘tgan yili ‘Daryo.uz’ saytida turmush o‘rtog‘im Furqat Isoqovga yordam murojaat qilgandim. Shundan keyin yig‘ilgan pulga ularni davolatgandik. Endi esa o‘g‘lim baxtsiz hodisa tufayli to‘shakka mixlangan. Bir ayol uchun ikki joningdan aziz bo‘lgan insonlarning yotib qolishi og‘irlik qilarkan. Qancha xijolatli bo‘lmasin, o‘g‘lim uchun yordam so‘rashga majburman.
Turmush o‘rtog‘im va men mehribonlik uyida katta bo‘lganmiz. Hozir Navoiy shahridagi davlat yotoqxonasida yashaymiz. Turmush o‘rtog‘im ikkinchi guruh nogironi, men esa hech qayerda ishlamayman. Faqatgina turmush o‘rtog‘imning 317 ming so‘mlik nafaqa puliga kun kechiramiz.
O‘g‘lim tezroq operatsiya qilinishi kerak. Uning uchun 20 million so‘m mablag‘ zarur, ammo bizda bir so‘m ham pul yo‘q. Barcha saxovatli insonlardan o‘g‘limning operatsiyasi uchun moddiy yordam berishlarini so‘rayman, — deydi biz bilan suhbatda Mohigul opa.
Barcha saxovatli yurtdoshlarimizdan Shohruxxon Isoqovga qo‘lidan kelgancha yordam berishlarini so‘rab qolamiz.
Shohruxxon Isoqovga xayriya qilish istagida bo‘lganlar uchun kerakli ma’lumotlar:
Plastik karta orqali:
Mohigul Mahmudova nomiga ochilgan
Xalq banki 86000609 72919618
Xorijdan mablag‘ yubormoqchi bo‘lganlar uchun pasport ma’lumotlari
Mahmudova Mohigul Shavkatovna
Pasport raqami: AB 6030326
Murojaat uchun +998913300589
Izoh (0)