Navoiy viloyatida tegishli hujjatlarsiz avtomobil boshqargan fuqaro YPX inspektoriga 100 dollar pora berishga uringanida qo‘lga olindi, deb xabar beradi IIV YHXB axborot xizmati.
25-yanvar kuni Navoiy viloyati IIB YHXB YPXO 1-safarbarlik guruhi YPX inspektori safdor A.O‘roqov Qiziltepa tumani hududida xizmat faoliyatini olib borayotgan vaqtida Lacetti rusumli mashinani to‘xtatgan.
Haydovchi V.A.ning yonida avtomashinani boshqarishga oid hujjatlari bo‘lmaganligi sababli unga nisbatan tegishli tartibda ma’muriy bayonnomani rasmiylashtirib, avtomashinani Qiziltepa tumanida joylashgan “Kusharti avtoservis kafolat” MCHJga qarashli avtomashinalarni to‘xtash jarima maydoniga joylashtirilgan.
Haydovchi V.A. avtomashinani jarima maydonidan chiqarib berishi evaziga YPX inspektoriga 100 dollar pora taklif qilgan.
Mazkur holat yuzasidan IIV O‘z xavfsizligi boshqarmasi Navoiy viloyati bo‘yicha bo‘limi va Navoiy viloyati IIB Jinoyat qidiruv boshqarmasi Korrupsiya va iqtisodiy jinoyatlarga qarshi kurashish bo‘limi xodimlari bilan hamkorlikda o‘tkazilgan tezkor tadbir jarayonida shu kuni soat 14:40 da Qiziltepa tumani IIB YHXB binosida fuqaro V.A. YPX inspektori safdor A.O‘roqovga pora tariqasida jami 100 AQSh dollari hamda 250 000 (ikki yuz ellik ming) so‘m pullarni berayotgan vaqtida tezkor tadbir qatnashchilari tomonidan daliliy ashyolar bilan ushlangan.
Hozirda mazkur holat yuzasidan IIV O‘z xavfsizligi boshqarmasi Navoiy viloyati bo‘yicha bo‘limi tomonidan tergovga qadar tekshiruv harakatlari olib borilmoqda.
Izoh (0)