Навоий вилоятида тегишли ҳужжатларсиз автомобиль бошқарган фуқаро ЙПХ инспекторига 100 доллар пора беришга уринганида қўлга олинди, деб хабар беради ИИВ ЙҲХБ ахборот хизмати.
25 январь куни Навоий вилояти ИИБ ЙҲХБ ЙПХО 1-сафарбарлик гуруҳи ЙПХ инспектори сафдор А.Ўроқов Қизилтепа тумани ҳудудида хизмат фаолиятини олиб бораётган вақтида Lacetti русумли машинани тўхтатган.
Ҳайдовчи В.А.нинг ёнида автомашинани бошқаришга оид ҳужжатлари бўлмаганлиги сабабли унга нисбатан тегишли тартибда маъмурий баённомани расмийлаштириб, автомашинани Қизилтепа туманида жойлашган «Кушарти автосервис кафолат» МЧЖга қарашли автомашиналарни тўхташ жарима майдонига жойлаштирилган.
Ҳайдовчи В.А. автомашинани жарима майдонидан чиқариб бериши эвазига ЙПХ инспекторига 100 доллар пора таклиф қилган.
Мазкур ҳолат юзасидан ИИВ Ўз хавфсизлиги бошқармаси Навоий вилояти бўйича бўлими ва Навоий вилояти ИИБ Жиноят қидирув бошқармаси Коррупция ва иқтисодий жиноятларга қарши курашиш бўлими ходимлари билан ҳамкорликда ўтказилган тезкор тадбир жараёнида шу куни соат 14:40 да Қизилтепа тумани ИИБ ЙҲХБ биносида фуқаро В.А. ЙПХ инспектори сафдор А.Ўроқовга пора тариқасида жами 100 АҚШ доллари ҳамда 250 000 (икки юз эллик минг) сўм пулларни бераётган вақтида тезкор тадбир қатнашчилари томонидан далилий ашёлар билан ушланган.
Ҳозирда мазкур ҳолат юзасидан ИИВ Ўз хавфсизлиги бошқармаси Навоий вилояти бўйича бўлими томонидан терговга қадар текширув ҳаракатлари олиб борилмоқда.
Изоҳ (0)