O‘zbekistonda korxona va tashkilotlarda ishlovchilarning o‘rtacha oylik nominal ish haqi 2,3 million so‘mni tashkil etdi. Davlat statistika qo‘mitasi hisobotida qayd etilishicha, bu 2018-yilning mos davriga nisbatan 30,1 foizga ko‘p.

Foto: “Daryo”

Bu qo‘lga beriladigan ish haqi emas. O‘rtacha hisoblangan nominal ish haqi hududda ro‘yxatdan o‘tgan tashkilotlar soni, ish haqi fondi va hodimlar soni kabi bir necha omillarga qarab hisoblab chiqiladi.

Uning tarkibiga ustama, mukofot, rag‘batlantirish xususiyatiga ega to‘lovlar, kompensatsiya va ishlanmagan vaqt uchun haq kabi to‘lovlar ham kiritilgan. Shuningdek, uning tarkibida jismoniy shaxslar daromad solig‘i va kasaba uyushmasiga to‘lovlar ham mavjud.

Respublika bo‘yicha 2019-yil yanvar—dekabr oylarida 2018-yilning mos davriga nisbatan iqtisodiy faoliyat turlari bo‘yicha o‘rtacha oylik nominal hisoblangan ish haqi yashash va ovqatlanish bo‘yicha xizmatlarda 40,1 foizga, bank, sug‘urta, lizing, kredit va vositachilik faoliyatida 37,2 foizga, ta’lim sohasida 33,3 foizga, sog‘liqni saqlash va ijtimoiy xizmatlar ko‘rsatishda 31,0 foizga, savdoda 24,7 foizga, san’at, ko‘ngil ochish va dam olishda 22,6 foizga, sanoatda 21,3 foizga, qurilishda 20,5 foizga, axborot va aloqada 19,3 foizga, tashish va saqlashda 18,4 foizga o‘sganligi kuzatilgan.

O‘zbekiston Prezidentining 2019-yil 12-iyuldagi “Ish haqi, pensiyalar, stipendiyalar va nafaqalar miqdorini oshirish to‘g‘risida”gi farmoniga muvofiq, 2019-yilning 1-sentabridan boshlab mehnatga haq to‘lashning eng kam miqdori 634 880 so‘mni tashkil etadi.