Ижтимоий тармоқларда «Ўзатом» агентлиги логотипи туширилган ва «Чернобил ҳудуди табиат учун жаннатга айланди» деб ёзилган слайд сурати тарқалиб, бу ҳолат баҳс-мунозараларни келтириб чиқарган эди. «Ўзатом» агентлиги ушбу ҳолат юзасидан расмий баёнот берди.
Маълум қилинишича, 18 январь куни Тошкентдаги Вестминстер халқаро университетида «Ўзбекистонда энергетика соҳасини ривожлантириш истиқболлари» мавзусида очиқ мулоқот бўлиб ўтган. Унда Чернобил АЭС ён-атрофидаги тарк этиш зонаси мисолида радиация ва нурланишнинг турли генетик мутацияларга ҳамда табиатга салбий таъсири тўғрисида слайд кўрсатилган, бироқ бу слайд, агентликнинг қайд этишича, ижтимоий тармоқларда «нотўғри талқин қилинмоқда».
«Ўзатом» агентлигининг маълум қилишича, очиқ мулоқотда чиқиш қилган маърузачи бу слайд билан қуйидагича фикр билдирмоқчи бўлган:
Ҳозирги кунда атом энергетикаси ва ядровий технологиялардан фойдаланиш соҳаси атрофида ҳақиқатга зид кўплаб афсоналар тарқалган. Шундай афсоналардан бири — радиациянинг таъсири натижасида наслда генетик ўзгаришлар ҳосил бўлиши.Агентликнинг қўшимча қилишича, тадбирда ушбу афсоналарнинг талқинидан ташқари АЭСнинг афзалликлари ва замонавий ядровий технологияларнинг хавфсизлик даражаси тўғрисида ҳам маълумот берилган.Тарихда катта миқдордаги радиациянинг аҳоли ва табиатга таъсири ҳолатлари юз берган. Масалан, Чернобил ўрмонларида икки каллали ҳайвонлар ёки мутантлар яшаши тўғрисида афсона мавжуд. Ёки Японияда Хиросима ва Нагасаки шаҳарлари бомбардимон қилингандан сўнг генетик ўзгаришлар билан болалар туғилгани ҳақида афсона мавжуд.
Кейинги слайдлардан кўриниб турибдики, Чернобил АЭСнинг тарк этиш зонасида ҳозирда одамлар яшамайди, у ерда ҳеч қандай хўжалик фаолияти амалга оширилмайди ва шу сабабли табиат гуллаб яшнамоқда.
«Ўзатом» агентлиги
Изоҳ (0)