Mudofaa vazirligi Havo hujumidan mudofaa qo‘shinlari va Harbiy havo kuchlariga qarashli janubi-g‘arbiy maxsus harbiy okrugning Qashqadaryo viloyatida joylashgan harbiy qismda harbiy uchuvchilarning murakkab uchish amaliyoti bo‘lib o‘tdi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.
Mi-8, Mi-24 kabi vertolyotlar hamda Mig-29, Su-25 kabi qiruvchi samolyotlarning havodagi manyovrlari – jangovar imkoniyatlarini namoyish etish maqsadida tashkil etilgan o‘quv mashg‘uloti O‘zbekiston oliy aviatsiya bilim yurti kursantlari uchun mahorat sabog‘i bo‘ldi.
Dastavval vertolyotlarni birvarakayiga parvozga chog‘lash, uchish apparatlarining parvozoldi taktik-texnik xususiyatlari, vertolyotlar bortida va qo‘mondonlik punkti bilan aloqani tashkillashtirish, xavfsizlik qoidalari, qo‘yilgan jangovar vazifa bo‘yicha havodagi harakat tartibi belgilangan.
“Aerodrom hududi bo‘ylab birin-ketin uchib qo‘nayotgan zamonaviy uchuv apparatlari yaxlit ko‘rinish kasb etib, milliy armiya mudofaa qudratining, xususan, Harbiy-havo kuchlarining nimalarga qodir ekanligini namoyon etdi. Shundan so‘ng qiruvchi samolyotlar havoga ko‘tarilib, murakkab parvozlarni amalga oshirdi”, — deyiladi xabarda.
Izoh (0)