O‘zbekistonda 2019-yilda 6 ta yirik loyiha doirasida jami 1076 megavatt elektr energiyasi quvvatlari ishga tushirildi. Bu haqda O‘zbekiston Prezidenti Shavkat Mirziyoyev boshchiligida 13-yanvar, dushanba kuni elektr energetikasi sohasini yanada rivojlantirish bo‘yicha joriy yilga asosiy vazifalar yuzasidan o‘tkazilgan yig‘ilishda ma’lum qilindi.
Yig‘ilishda elektr energetikasi tarmog‘ini rivojlantirish bo‘yicha 2020-yil uchun vazifalar muhokama qilindi.
Qayd etilishicha, elektr energetikasi iqtisodiy o‘sishning barqarorligini va aholi farovonligini ta’minlaydigan muhim manba hisoblanadi. Bu tarmoqni modernizatsiya qilish, energiya quvvatlarini ko‘paytirish va iste’molchilarga uzluksiz yetkazib berish bo‘yicha katta ishlar amalga oshirilmoqda.
Davlat rahbarining 2019-yil 1-fevraldagi qaroriga muvofiq, O‘zbekiston Respublikasi Energetika vazirligi tashkil etilgan edi. O‘sha yilning 27-martidagi Prezident qaroriga asosan, “O‘zbekenergo” aksiyadorlik jamiyati isloh qilinib, uning negizida “Issiqlik elektr stansiyalari”, “O‘zbekiston milliy elektr tarmoqlari” va “Hududiy elektr tarmoqlari” aksiyadorlik jamiyatlari tashkil topdi.
Izoh (0)