Ўзбекистонда 2019 йилда 6 та йирик лойиҳа доирасида жами 1076 мегаватт электр энергияси қувватлари ишга туширилди. Бу ҳақда Ўзбекистон Президенти Шавкат Мирзиёев бошчилигида 13 январь, душанба куни электр энергетикаси соҳасини янада ривожлантириш бўйича жорий йилга асосий вазифалар юзасидан ўтказилган йиғилишда маълум қилинди.
Йиғилишда электр энергетикаси тармоғини ривожлантириш бўйича 2020 йил учун вазифалар муҳокама қилинди.
Қайд этилишича, электр энергетикаси иқтисодий ўсишнинг барқарорлигини ва аҳоли фаровонлигини таъминлайдиган муҳим манба ҳисобланади. Бу тармоқни модернизация қилиш, энергия қувватларини кўпайтириш ва истеъмолчиларга узлуксиз етказиб бериш бўйича катта ишлар амалга оширилмоқда.
Давлат раҳбарининг 2019 йил 1 февралдаги қарорига мувофиқ, Ўзбекистон Республикаси Энергетика вазирлиги ташкил этилган эди. Ўша йилнинг 27 мартидаги Президент қарорига асосан, «Ўзбекэнерго» акциядорлик жамияти ислоҳ қилиниб, унинг негизида «Иссиқлик электр станциялари», «Ўзбекистон миллий электр тармоқлари» ва «Ҳудудий электр тармоқлари» акциядорлик жамиятлари ташкил топди.
Изоҳ (0)