Elektr energiyasi ta’minotida uzilishlar kuzatiladigan bo‘lsa, bolalar bog‘chalari ham o‘tindan foydalanishga majbur bo‘ladi. Bu haqda maktabgacha ta’lim vaziri o‘rinbosari Shodiyor Mamatqulov “Daryo” muxbiri Musulmonbek Ibrohimovga bergan intervyusida aytib o‘tdi.
Avvalroq senator Zayniddin Nizomxo‘jayev O‘zbekistondagi 343 ta bolalar bog‘chasida ovqat tayyorlash uchun o‘tindan foydalanilayotganini ma’lum qilgandi. Bunday holat Andijondagi 113 ta, Farg‘onadagi 107 ta, Namangandagi 41 ta va Samarqand viloyatidagi 33 ta bog‘chada aniqlangan.
Vazir o‘rinbosari Mamatqulovning so‘zlariga ko‘ra, bolalar bog‘chalariga o‘tin sotib olish va uni yetkazib berish uchun mablag‘ ajratilmagani bois senatorlar ushbu masalaga e’tibor qaratgan.
Barcha tuman va shaharlar ham gaz bilan ta’minlanmagan, shu bois maktabgacha ta’lim tashkilot (MTT)larida ovqat tayyorlash uchun asosan elektr pechlardan foydalaniladi. Elektr ta’minotida ham ba’zida uzilishlar bo‘lib turadi. Shunday uzilishlar vaqtida MTTlarda zaxira sifatida o‘tinga moslashtirilgan o‘choqlar ham tayyorlab qo‘yilgan.Ma’lumot uchun, O‘zbekiston bo‘yicha mavjud 5 854 ta davlat maktabgacha ta’lim tashkilotlari oshxonasining moddiy-texnik holatini yaxshilash uchun 391 milliard so‘m mablag‘ talab etiladi.Nafaqat 343 ta bog‘cha, agar elektr ta’minotida kun davomida uzilish bo‘lsa, boshqa bog‘chalar ham o‘tindan foydalanishga majbur bo‘ladi. Senatorlarning aynan shu masalaga e’tibor qaratganining asosiy sababi — 2019-yilgi budjetda MTTlarga o‘tin yetkazib berish bo‘yicha mablag‘ nazarda tutilmagan. Ehtimol, bu rejalashtirishdagi bizning aybimizdir.
Maktabgacha ta’lim tashkilotlarida o‘tindan foydalanishga barham berish maqsadida bolalar bog‘chalariga suyultirilgan gaz-ballonlarini yetkazib berish bo‘yicha ish olib boryapmiz, bu bo‘yicha Vazirlar Mahkamasi tomonidan ham topshiriq berilgan.
Shuningdek, yangi quriladigan MTTlar loyihasiga yozgi zaxira o‘choqli oshxonalarni ham kirityapmiz — gaz bo‘lsa, gazda, elektr bo‘lsa, elektrda ishlaydi. Ikkisi ham bo‘lmasa, o‘tindan foydalaniladi. Masalan, Qashqadaryo, Surxondaryo va Samarqand viloyatlarida shunday MTTlar ishlab turibdi.
Shodiyor Mamatqulov, maktabgacha ta’lim vaziri o‘rinbosari
Izoh (0)