Sudda Andijon tumani hokimligining talabi rad etildi, deb yozadi O‘zA.
“Andijonnoma” gazetasining 2019-yil 2-martdagi sonida jurnalist Qobiljon Asqarovning “O‘zi xon, ko‘lankasi maydonmi?” nomli tanqidiy maqolasi chop etilgan bo‘lib, unda Andijon tumani hokimi Ulug‘bek Isomiddinov faoliyati bilan bog‘liq ishlar xususan, Andijon tumanidagi tashkilotlarda kadrlar qo‘nimsizligi avj olganligi, qishloq xo‘jaligidagi qoloqlik sabablari, unumdor yer maydonlaridan boshqa maqsadda foydalanish holatlari, fuqarolar murojaatiga e’tiborsizlik xususida so‘z yuritilgan.
Andijon tuman hokimligining “Maqolani qonun talablariga zid deb topish va tahririyatga raddiya chop etish majburiyatini yuklash haqidagi” 19-banddan iborat da’vo arizasi Fuqarolik ishlari bo‘yicha Andijon tumanlararo sudi tomonidan ko‘rib chiqilib, 2019-yilning 12-iyulda sud raisi M. Ahmadaliyeva raisligida hal qiluv qarori chiqarilgan. Qarorda tahririyatga maqolada keltirilgan qator faktlar yuzasidan raddiya berish majburiyati yuklangan edi.
Sud qarori yuzasidan norozi bo‘lgan tahririyat fuqarolik ishlari bo‘yicha viloyat sudiga kassatsiya shikoyati kiritgan. Kuni kecha mazkur nizoli ish Fuqarolik ishlari bo‘yicha viloyat sudida sudya G. Asronova raisligida ko‘rib chiqilib, ajrim chiqarildi. Unga ko‘ra, Andijon tumanlararo sudining 2019-yilning 12-iyuldagi qarori bekor qilinib, tahririyatga maqolada keltirilgan faqat bir holat bo‘yicha raddiya chop etish majburiyati yuklandi.
Izoh (0)