11-yanvar kuni Qur’oni Karimning navbatdagi adadi sotuvga chiqarildi, deb xabar berdi “Islom.uz”.
Qayd etilishicha, bu Mus’haf Madina Mus’hafining nusxasi asosida, rasmi Usmoniyda, imom Hafsning imom Osimdan qilgan rivoyatiga ko‘ra hamda xattot shayx Usmon Tohoning xatida tayyorlangan. Qur’oni Karimning ushbu nusxasini ko‘rikdan o‘tkazish, zavobitlarini qo‘yish va tadqiq etish ishlari Suriya Arab Respublikasi “Mus’haf bitish ilmiy hay’ati”ning sobiq rahbari, shayx, hofiz Yahyo Muhammad Nosih boshchiligidagi mutaxassislar tarafidan amalga oshirilgan.
U Ismoil Muhammad Sodiq rahbarligidagi “Hilol-nashr” nashriyot-matbaasida “G‘avsoniy” nashriyotining rasmiy ruxsati va asliy nusxasi asosida O‘zbekiston musulmonlari idorasi bilan hamkorlikda nashrga tayyorlangan.
“Bugungi sana qalblari Qur’onga oshno muxlislar uchun yana bir bor unutilmas kun bo‘ldi. Qur’onni qo‘liga olgan va uni ko‘ziga surtgan Mus’haf muxlislarining ko‘zlaridan sevinch yoshlari qalqidi.
Alloh taolo ushbu xayrli ishlarga bosh-qosh bo‘lganlarni Qur’on bilan band qilsin, Qur’on hidoyatida bardavom qilsin, oxiratda Qur’on shafoatiga erishtirsin!”, — deyiladi xabarda.
Izoh (0)