Muzaffar Soliyev: O‘zbekiston eng ko‘p suv iste’mol qiladigan davlatlardan biri hisoblanadi

O‘zbekistonda suv narxi eng arzon narxlardan hisoblanadi, ya’ni 310 so‘m. Shuningdek, O‘zbekiston eng ko‘p suv iste’mol qiladigan davlatlardan biri ham hisoblanadi. Bu haqda O‘zbekiston uy-joy kommunal xizmat ko‘rsatish vaziri Muzaffar Soliyev Xalqaro press klubda bo‘lib o‘tgan sessiyada ma’lum qildi.

Vazirning so‘zlariga ko‘ra, O‘zbekiston ishlatadigan barcha turdagi suvlarning 94,5 foizi yuridik sohaga yo‘naltiriladigan, yani qishloq xo‘jaligi, ishlab chiqarish va boshqalar. Qolgan 5,5 foizni esa fuqarolar iste’mol qiladigan suvlar tashkil etadi.

Respublika bo‘ylab 13 mingdan oshiq quduq mavjud bo‘lib, toza ichimlik suvi asosan yer osti quvurlaridan olinadi.

Muzaffar Soliyevning ma’lum qilishicha, O‘zbekiston fuqarolarining 9 foizi maxsus mashinalarda yetkaziladigan suvni iste’mol qiladi. Bunga Qoraqalpog‘iston Respublikasi, Farg‘ona viloyati, Qashqadaryo viloyati va boshqa viloyatlardagi chekka hududlarda istiqomat qiladigan fuqarolar kiradi.

Vazirning ma’lum qilishicha, chet eldan suv iste’molini hisoblaydigan hisoblagichlar olib kelingan. Bu hisoblagichlarning eskisidan farqli shundaki, ular axborotni uzatish imkonini beradi. Ya’ni Majburiy ijro byurosi xodimlari iste’molchining uyiga borib, xonadon egasini bezovta qilib suv iste’moli miqdorini tekshirishi shart bo‘lmaydi. Shuningdek, bu axborotlar bitta bazada yig‘iladi va hech qanday inson omili aralashishiga imkon bermaydi. 3 yil davomida O‘zbekiston fuqarolarining barchasini suvdan foydalanishni hmoyalaydigan individual hisoblagichlardan foydalanishga o‘tkazish rejalashtirilmoqda.

Qayd etilishicha, O‘zbekiston bo‘yicha bugungi kunga qadar fuqarolarning suvdan 411 milliard so‘m qarzdorligi mavjud.

Muzaffar Soliyevning aytishicha, agar xorijiy banklardan 4,5 milliard dollar investitsiya olinsa, 2030-yilga qadar aholining 91,2 foizi ichimlik suv bilan va 51,1 foizi oqova suv xizmatlari bilan qamrab olinadi.

Vazirning qayd etishicha, Jizzax shahrining suv oqova tizmini butunlay qayta ta’mirlash rejalashtirilgan bo‘lib, qurilish ishlari boshlangan. 2020-yil yakuniga qadar Samarqand, Buxoro va boshqa yirik shaharlarning suv oqova tizimi qayta ta’mirlanadi.

Ta’kidlanishicha, 2019-yilda sohadagi muammoalrni hal qilish maqsadida 19 ta normativ hujjat qabul qilingan.