Telegram’dagi “Qo‘shni mahalla” kanalida e’lon qilingan xabarga javoban Dehqonobod tuman hokimi Zoir Aliqulov bugun — 7-yanvar kuni ishchi guruh bilan aytilgan manzilga borgan va holatni ko‘zdan kechirgan. Bu haqda “Daryo”ga tuman hokimligi axborot xizmati xabar berdi.
Ma’lum bo‘lishicha, Shamolikam qishlog‘ida 7-maktab filiali joylashgan bo‘lib, 60 nafar o‘quvchi tahsil oladi. Filialda 8 nafar o‘qituvchi boshlang‘ich sinf o‘quvchilariga ta’lim-tarbiya beradi.
Suratda o‘quvchilarning suvdan o‘tishiga ko‘maklashayotgan o‘qituvchi Sayfulla Xudoyqulovning aytishicha, mazkur surat 2019-yil 2-may kuni olingan.
— Odatda bahor oylarida bu yerdan sel keladi, — deydi Sayfulla Xudoyqulov. – O‘sha payt filialdagi 8 nafar o‘qituvchi navbat-navbat o‘quvchilarni suvdan o‘tkazamiz. Boshqa payt bu yerdan sel kelmaydi.
Vaziyat bilan tanishgan hokim nafaqat o‘quvchilar uchun, daryoning nariga tomonida istiqomat qiluvchi 80 dan ortiq xonadon vakillari ham o‘tib-qaytuvchi ko‘prik qurib berishni va’da qildi.
— Issiq jonning isitmasi bor deganlaridek, qishloq aholisi tez yordam mashinasini chaqirishi mumkin yoki o‘zlari mashinada shifoxonga borishga to‘g‘ri kelishi mumkin. Shuning uchun ham aholi koriga ham yaraydigan ko‘prik quramiz, — dedi hokim Zoir Aliqulov qishloq aholisi bilan muloqotda.
Ta’kidlanishicha, ushbu hudud uchun ko‘prik qurish taklifi ilgari ham o‘rtaga tashlangan bo‘lib, Qarshi Mintaqaviy temir yo‘l uzeli bilan hamkorlikda ishlar ham boshlab yuborilgan. Ko‘prik qurilishi uchun qurilish materiallari olingan. Yo‘l tekislangan. Ammo betonlash ishlarini bajarish uchun havo sovuq bo‘lgani bois, ma’lum muddatga to‘xtab qolgan. Hokim ishlarni davom ettirish uchun mutasaddilarga topshiriq berdi.
Aytilishicha, mazkur hududdagi ko‘prik sel davri boshlangunga qadar qurib bitkaziladi.
Filial o‘qituvchilari va xodimlari bilan suhbat chog‘ida hokim boshqa muammolar bilan ham qiziqqan.
— Maktabimiz sinfxonalari qizimaydi, — deydi aholi vakillaridan biri Ahmad Muhammadiyev. – Boisi, maktab qozonxonasi noto‘g‘ri montaj qilingan. Qancha ko‘mir yoqsangiz ham isimaydi. Hash-pash deguncha o‘qish boshlanadi. Bolalarimiz qiynaladi.
Mazkur muammodan xabar topgan hokim tuman XTB mudiri O‘ktam Toshboyevga 1 kun muhlat berib, filialning isitish tizimidagi muammolarini o‘rganish va bu haqda hokimlikka axborot berish haqida topshiriq berdi. Aytilishicha, ta’til tugab o‘qish boshlangunga qadar filialning isitish tizimidagi muammolar ham bartaraf etiladi.
Eslatib o‘tamiz, avvalroq Dehqonobodda o‘quvchilar daryo kechib maktabga borayotgani xabar qilingandi.
Izoh (0)