O‘zbekiston Oliy Majlisi Qonunchilik palatasida eng ko‘p deputatlik o‘rniga ega bo‘lgan Tadbirkorlar va ishbilarmonlar harakati — O‘zbekiston Liberal-demokratik partiyasi O‘zbekiston bosh vaziri nomzodini ko‘rsatadi. Bu haqda Markaziy saylov komissiyasi raisi Mirzo Ulug‘bek Abdusalomov 6-yanvar, dushanba kuni bo‘lib o‘tgan matbuot anjumanida ma’lum qildi.
Mavzuga doir: Yangi O‘zbekistonning yangi parlament saylovlari yakuniy natijasi deyarli eski O‘zbekistonnikidek bo‘ldi
Bosh vazir nomzodi Oliy Majlisi Qonunchilik palatasi deputatligiga saylovda eng ko‘p deputatlik o‘rniga ega bo‘lgan siyosiy partiya yoki teng miqdordagi deputatlik o‘rniga ega bo‘lgan bir nechta siyosiy partiya tomonidan ko‘rsatiladi.
O‘zbekiston Prezidenti bosh vazirlikka ko‘rsatilgan nomzodni 10 kunlik muddat ichida ko‘rib chiqqach, uni Oliy Majlis palatalariga ko‘rib chiqish va tasdiqlash uchun kiritadi. Bosh vazir nomzodi agar u Oliy Majlis Qonunchilik palatasi deputatlari va Senati a’zolari umumiy sonining yarmidan ko‘pi tomonidan qo‘llab-quvvatlansa, tasdiqlangan hisoblanadi.
O‘zbekistonning amaldagi bosh vaziri hisoblangan Abdulla Aripov nomzodi O‘zbekiston Liberal-demokratik partiyasidan ko‘rsatilgan. Saylovoldi kampaniyasi vaqtida partiya o‘z nomzodini o‘zgartirmoqchi emasligini ma’lum qilgan.
O‘zbekiston Xalq demokratik partiyasi agar saylovda eng ko‘p ovozni olsa, O‘zbekiston bosh vazirining birinchi o‘rinbosari — transport vaziri Ochilboy Ramatov nomzodini bosh vazirlikka ilgari surishini ma’lum qilgan edi.
“Adolat” sotsial-demokratik partiyasi bosh vazir lavozimga amaldagi Adliya vaziri Ruslanbek Davletov nomzodini ko‘rsatishni rejalashtirgan edi. Bundan tashqari, “Adolat”da partiya a’zolari bo‘lgan sog‘liqni saqlash vaziri Alisher Shodmonov hamda oliy va o‘rta maxsus ta’lim vaziri Inomjon Majidov nomzodi ham bor edi.
O‘zbekiston ekologik partiyasi esa saylovda g‘alaba qozonsa, O‘zbekiston bosh vaziri lavozimiga “O‘zkimyosanoat” boshqaruvi raisi Odil Temirov, “Hududiy elektr tarmoqlari” boshqaruvi raisi Ulug‘bek Mustafoyev hamda Agromir Group direktorlar kengashi raisi Shavkat Jalolov kabi nomzodlardan biri kelishi mumkinligini ma’lum qilgan edi.
O‘zbekiston Milliy tiklanish demokratik partiyasi esa nomzodlar nomini ma’lum qilmagan edi.
Ma’lumot uchun, saylovlarning umumiy yakunlariga ko‘ra, Oliy Majlis Qonunchilik palatasida siyosiy partiyalar quyidagicha deputatlik o‘rinlariga ega bo‘ldi:
- O‘zLiDeP — 53 nafar (35 foiz);
- “Milliy tiklanish” — 36 nafar (24 foiz);
- “Adolat” SDP — 24 nafar (16 foiz);
- O‘zXDP — 22 nafar (15 foiz);
- Ekopartiya — 15 nafar (10 foiz).
Izoh (0)