Ўзбекистон Олий Мажлиси Қонунчилик палатасида энг кўп депутатлик ўрнига эга бўлган Тадбиркорлар ва ишбилармонлар ҳаракати — Ўзбекистон Либерал-демократик партияси Ўзбекистон бош вазири номзодини кўрсатади. Бу ҳақда Марказий сайлов комиссияси раиси Мирзо Улуғбек Абдусаломов 6 январь, душанба куни бўлиб ўтган матбуот анжуманида маълум қилди.
Мавзуга доир: Янги Ўзбекистоннинг янги парламент сайловлари якуний натижаси деярли эски Ўзбекистонникидек бўлди
Бош вазир номзоди Олий Мажлиси Қонунчилик палатаси депутатлигига сайловда энг кўп депутатлик ўрнига эга бўлган сиёсий партия ёки тенг миқдордаги депутатлик ўрнига эга бўлган бир нечта сиёсий партия томонидан кўрсатилади.
Ўзбекистон Президенти бош вазирликка кўрсатилган номзодни 10 кунлик муддат ичида кўриб чиққач, уни Олий Мажлис палаталарига кўриб чиқиш ва тасдиқлаш учун киритади. Бош вазир номзоди агар у Олий Мажлис Қонунчилик палатаси депутатлари ва Сенати аъзолари умумий сонининг ярмидан кўпи томонидан қўллаб-қувватланса, тасдиқланган ҳисобланади.
Ўзбекистоннинг амалдаги бош вазири ҳисобланган Абдулла Арипов номзоди Ўзбекистон Либерал-демократик партиясидан кўрсатилган. Сайловолди кампанияси вақтида партия ўз номзодини ўзгартирмоқчи эмаслигини маълум қилган.
Ўзбекистон Халқ демократик партияси агар сайловда энг кўп овозни олса, Ўзбекистон бош вазирининг биринчи ўринбосари — транспорт вазири Очилбой Раматов номзодини бош вазирликка илгари суришини маълум қилган эди.
«Адолат» социал-демократик партияси бош вазир лавозимга амалдаги Адлия вазири Русланбек Давлетов номзодини кўрсатишни режалаштирган эди. Бундан ташқари, «Адолат»да партия аъзолари бўлган соғлиқни сақлаш вазири Алишер Шодмонов ҳамда олий ва ўрта махсус таълим вазири Иномжон Мажидов номзоди ҳам бор эди.
Ўзбекистон экологик партияси эса сайловда ғалаба қозонса, Ўзбекистон бош вазири лавозимига «Ўзкимёсаноат» бошқаруви раиси Одил Темиров, «Ҳудудий электр тармоқлари» бошқаруви раиси Улуғбек Мустафоев ҳамда Agromir Group директорлар кенгаши раиси Шавкат Жалолов каби номзодлардан бири келиши мумкинлигини маълум қилган эди.
Ўзбекистон Миллий тикланиш демократик партияси эса номзодлар номини маълум қилмаган эди.
Маълумот учун, сайловларнинг умумий якунларига кўра, Олий Мажлис Қонунчилик палатасида сиёсий партиялар қуйидагича депутатлик ўринларига эга бўлди:
- ЎзЛиДеП — 53 нафар (35 фоиз);
- «Миллий тикланиш» — 36 нафар (24 фоиз);
- «Адолат» СДП — 24 нафар (16 фоиз);
- ЎзХДП — 22 нафар (15 фоиз);
- Экопартия — 15 нафар (10 фоиз).
Изоҳ (0)