Qashqadaryolik ayol vahshiylarcha o‘ldirilgan o‘g‘lining qotillaridan ikki nafari ozodlikda yurganidan shikoyat qildi

Ijtimoiy tarmoqlarda S.M. ismli ayolning “O‘g‘limni o‘ldirganlar ko‘pchilik bo‘lsa-da, lekin bir kishining bo‘yniga qo‘yishmoqchi” sarlavha ostidagi audioyozuvi tarqaldi.

Mazkur audioyozuvda arz qilgan ayol S.M. 30 yashar o‘g‘li J.X.ni bir necha shaxs vahshiylarcha o‘ldirgani, bitta gumonlanuvchi Rossiyaga qochirib yuborilgani, uning pasporti olib qo‘yilmagani, qon tahlilida boshqa odamning qoni chiqqani, tergov noto‘g‘ri qilingani, ekspertiza xulosasiga ko‘ra qon tahlilida uning o‘g‘linikidan tashqari yana uch kishining qoni borligi, ular orasida o‘g‘lini uyidan olib chiqib ketgan bolaning qoni yo‘qligi, bu bola vositachi bo‘lib, o‘g‘lini o‘ldirganlar boshqa ekanligini bildirgan.

Bosh prokuratura matbuot kotibi Hayot Shamsutdinovning “Daryo”ga ma’lum qilishicha, 2019-yilning 27-sentabrida soat 18:00 larda Yakkabog‘ tumani, “Alaqarg‘a” qishlog‘ida joylashgan oshxona ro‘parasida J.X. bosh qismining ensa sohasida o‘tkir sanchib kiruvchi jism bilan yetkazilgan tan jarohati bilan hushsiz holatda topilgan.

Mazkur holat yuzasidan shu kuni Jinoyat kodeksining 25, 97-moddasi 1-qismi (Qasddan odam o‘ldirishga suiqasd qilish) bilan jinoyat ishi qo‘zg‘atilgan.

J.X. ko‘rsatilgan tibbiy muolajalarga qaramasdan 29-sentabr kuni shifoxonada vafot etgan.

Sudga oid tibbiy ekspertizaning xulosasida J.X.ning o‘limi “bosh miyaning ochiq shikastlanib, og‘ir darajali lat yeyishi, bosh miya to‘qimasiga va miya qorinchalariga qon quyilishi, o‘ng chakka peshona suyaklarining botib sinishi” kabi jarohatlarning kechishi jarayonida rivojlangan o‘tkir yurak qon-tomir yetishmovchiligidan kelib chiqqanligi ko‘rsatilgan.

To‘plangan tergov hujjatlariga ko‘ra, ushbu jinoyatni oldindan bo‘lgan kelishmovchilik tufayli Sh.S. sodir etganligi aniqlangan.

Tergov natijasiga ko‘ra, Sh.S.ga Jinoyat kodeksining 97-moddasi 1-qismi (Qasddan odam o‘ldirish) bilan ayblov e’lon qilinib, qamoq ehtiyot chorasi qo‘llanilgan. Jinoyat ishi 31-dekabr kuni ayblov xulosasi bilan Jinoyat ishlari bo‘yicha Chiroqchi tumani sudiga yuborilgan.

Prokuratura xabarida ta’kidlanishicha, hozirda jinoyat ishi sudda ko‘rilmoqda.